IPL 2021, DC vs SRH, Live: आयपीएलमध्ये आज दुबईच्या स्टेडियमवर सनरायझर्स हैदराबाद (Sunrisers Hyderabad) विरुद्ध दिल्ली कॅपिटल्स (Delhi Capitals) यांच्यात सामना होत आहे. सनरायझर्स हैदराबादनं सामन्याची नाणेफेक जिंकली असून प्रथम फलंदाजीचा निर्णय घेतला आहे. सनरायझर्स हैदराबादचा संघ यंदाच्या सीझनमध्ये आधीच निराशाजनक कामगिरीमुळे झगडत असताना आजच्या सामन्याआधी संघाला मोठा धक्का बसला आहे.
हैदराबादचा वेगवान गोलंदज टी नटराजन याची कोरोना चाचणी पॉझिटिव्ह आली आहे. त्यामुळे नटराजनसह त्याच्याशी संपर्कात आलेल्या सहा जणांना क्वारंटाइन करण्यात आलं आहे. यात विजय शंकर याचाही समावेश आहे. दुसरीकडे दिल्ली कॅपिटल्सचा संघ दमदार कामगिरीसह गुणतालिकेत दुसऱ्या स्थानावर आहे. आजचा सामना जिंकून संघाला पुन्हा एकदा अव्वल स्थान गाठण्याची संधी आहे.
हैदराबादच्या संघात आज विस्फोटक फलंदाज डेव्हिड वॉर्नरचं पुनरागमन झालं आहे. तर दिल्लीच्या संघात घातक गोलंदाज कगिसो रबाडा दाखल झाला आहे. ऋषभ पंतच्या नेतृत्त्वाखाली दिल्लीच्या युवा ब्रिगेडनं पहिल्या टप्प्यात उल्लेखनीय कामगिरीचं दर्शन घडवलं आहे. त्यामुळे पहिल्या टप्प्यातील फॉर्म दुसऱ्या टप्प्यात कायम राखण्यासाठी आजचा सामना दिल्लीसाठी अतिशय महत्त्वाचा ठरणार आहे.
विशेष म्हणजे, राजस्थान आणि पंजाब यांच्यात काल दुबईच्या ज्या खेळपट्टीवर सामना खेळविण्यात आला होता. आजचा सामना देखील त्याच खेळपट्टीवर होत आहे. त्यामुळे आजही धावांचा पाऊस पडणार का हे पाहणं महत्त्वाचं असणार आहे.