मुंबई - आयपीएलमध्ये काल चेन्नई सुपरकिंग्स आणि पंजाब किंग्स यांच्यात झालेला अटीतटीचा सामना पंजाबने जिंकला. शेवटच्या षटकापर्यंत रंगलेल्या या सामन्यादरम्यान चेन्नईचा पराभव झाला असला, तरी चेन्नईची फॅन असलेल्या एका मिस्ट्री गर्लच्या सुंदर रिअॅक्शन आता सोशल मीडियावर व्हायरल झाली आहे. तसेच या मिस्ट्री गर्लच्या अदांवर फॅन्सही फिदा झाले आहेत.
सामन्यात १८८ धावांच्या आव्हानाचा पाठलाग करण्यासाठी उतरलेल्या चेन्नईचा डाव सुरू असताना अंबाती रायडू षटकार चौकारांचा पाऊस पाडत होता. चेन्नईच्या डावात १६ व्या षटकामध्ये जेव्हा रायडूने सलग ३ षटकार मारले तेव्हा एका तरुणीची जल्लोष करतानाची अदा स्क्रीनवर झळकली. त्यानंतर हा फोटो सोशल मीडियावर व्हायरल झाला.
रायडूच्या षटकारांनंतर जल्लोष करणारी ही तरुणी दुसरी तिसरी कुणी नसून अभिनेत्री श्रुती तुली आहे. ती चेन्नई सुपरकिंग्स आणि पंजाब किंग्स यांच्यातील सामना पाहण्यासाठी वानखेडे स्टेडियममध्ये आली होती. तिला सामन्यादरम्यान, दोन तीन वेळा स्क्रिनवर दाखवले गेले. ती पिवळा टॉप परिधान करून चेन्नईला सपोर्ट करत होती. जेव्हा अंबाती रायडू आणि एमएस धोनीने षटकार मारले, तेव्हा श्रुतीने एकच जल्लोष केला.
श्रुतीने तिच्या इन्स्टाग्रामवरही हा व्हायरल फोटो पोस्ट केला आहे. तसेच स्टेडियमच्या आतील एक फोटोही शेअर केला आहे. हा फोटो व्हायरल झाल्यानंतर श्रुतीच्या इन्स्टाग्रामच्या फॉलोअर्समध्येही मोठ्या प्रमाणात वाढ झाली आहे. तसेच अनेक मिम्सही तयार होऊ लागले आहेत.
या आयपीएलमध्ये आतापर्यंत अनेक मिस्ट्री गर्ल्स व्हायरल झाल्या आहेत. त्यांच्या रिअॅक्शन सोशल मीडियावर कौतुकाचा विषय ठरत आहेत.