IPL 2022 Mumbai Indians vs Royal Challengers Bangalore Live Updates : अनुज रावत आणि विराट कोहली यांनी दमदार खेळ करताना रॉयल चॅलेंजर्स बंगळुरूला सहज विजय मिळवून दिला. मुंबई इंडियन्सचा हा IPL 2022 मधील सलग चौथा पराभव ठरला. मुंबई इंडियन्सने विजयासाठी ठेवलेले १५२ धावांचे लक्ष्य बंगळुरूने ७ विकेट्स व ९ चेंडू राखून सहज पार केले. अनुज रावतने ४७ चेंडूंत ६६ धावांची मॅच विनिंग खेळी केली आणि त्याला मॅन ऑफ दी मॅच पुरस्काराने गौरवण्यात आले. विराट कोहली ४८ धावांवर दुर्दैवीरित्या बाद झाला आणि अम्पायरच्या चुकीच्या निर्णयामुळे त्याचा पारा चढला. रागाने मैदानाबाहेर जाताना त्याने अपशब्द वापरल्याचा व्हिडीओ व्हायरल झाला.
रोहित शर्मा व इशान किशन यांनी पहिल्या विकेटसाठी ५० धावा जोडल्या, परंतु पुढील २९ धावांत त्यांच्या ६ विकेट्स पडल्या. सूर्यकुमार यादवने ७व्या विकेटसाठी जयदेव उनाडकतसह ४१ चेंडूंत ७२ धावांची भागीदारी केली. सूर्यकुमारने ६८ धावा चोपल्या. जयदेव १३ धावांवर नाबाद राहिला. या दोघांनी मुंबईला ६ बाद १५१ धावांपर्यंत पोहोचवले. RCB कडून हर्षल पटेल ( २-२३) व वनिंदू हसरंगा ( २-२८) यांनी प्रत्येकी दोन विकेट्स घेतल्या. ग्लेन मॅक्सवेलने एक अप्रतिम रन आऊट केला आणि आकाश दीपने एक बळी टिपला.
प्रत्युत्तरात अनुज रावत ( Anuj Rawat ) आणि फॅफ ड्यू प्लेसिस यांनी ८ षटकांत ५० धावा फलकावर चढवल्या. उनाडकतने ९व्या षटकात फॅफल ( १६) बाद केले. त्यानंतर रावत व विराट कोहली यांनी ५२ चेंडूंत ८० धावांची भागीदारी केली. रावतने ४७ चेंडूंत २ चौकार व ६ षटकारांनी ६६ धावांची खेळी केली. १९व्या षटकात डेवॉल्ड ब्रेव्हिसच्या गोलंदाजीवर विराट LBW झाला. अम्पायरच्या या निर्णयावर विराट नाराज दिसला. त्याने ३६ चेंडूंत ५ चौकारांसह ४८ धावा केल्या. त्यानंतर आलेल्या ग्लेन मॅक्सवेलने सलग दोन चौकार खेचून RCBचा विजय पक्का केला. चुकीचे बाद दिल्यामुळे विराटने तीव्र नाराजी व्यक्त केली आणि मैदानावर जोरात बॅट आपटून राग व्यक्त केला.
पाहा व्हिडीओ..
Web Title: IPL 2022 MI vs RCB Live Updates : Virat Kohli was absolutely unhappy with that decision, Watch Video
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
