Pollard vs Hetmyer, IPL 2022 MI vs RR Live: मुंबई इंडियन्स विरूद्धच्या सामन्यात वानखेडे स्टेडियमवर राजस्थानने प्रथम फलंदाजी करताना १९३ धावा कुटल्या. राजस्थानचा सलामीवीर जोस बटलरचं झंझावाती शतक आणि संजू सॅमसन, शिमरॉन हेटमायर यांच्या फटकेबाजीच्या बळावर राजस्थानने मुंबईकरांची चांगलीच धुलाई केली. नेहमी इतर गोलंदाजांना चोपणाऱ्या किरॉन पोलार्डला आज शिमरॉन हेटमायरनेच जोरदार चोप दिला.
राजस्थानचे यशस्वी जैस्वाल (१) आणि देवदत्त पडीक्कल (७) स्वस्तात बाद झाले. त्यानंतर जोस बटलरने तुफान फटकेबाजी केली. त्याने बेसिल थंपीला एका षटकात २६ धावा झोडल्या. संजू सॅमसन ३० धावांवर बाद झाल्यानंतर शिमरॉन हेटमायरने बटलरला साथ दिली. हेटमायरने किरॉन पोलार्डला एका षटकात तब्बल २६ धावा कुटल्या.
पोलार्डला मोठा फटका दिल्यानंतर पुढच्या षटकात मात्र हेटमायर बाद झाला. त्याने १४ चेंडूत ३५ धावा केल्या. पण जोस बटलरने मात्र १९व्या षटकापर्यंत तग धरला. त्याने तुफानी खेळी करत शतक ठोकलं. जोस बटलरने ६८ चेंडूत ११ चौकार आणि ५ षटकारांच्या साथीने १०० धावांची धुवांधार खेळी केली.