IPL 2022 T20 Match LSG vs GT Live : इंडियन प्रीमिअर लीगच्या १५व्या पर्वात नव्याने दाखल झालेले गुजरात टायटन्स ( Gujarat Titans) आणि लखनौ सुपर जायंट्स ( Lucknow Super Giants ) यांच्यात एकतर्फा लढत झालेली पाहायला मिळतेय. आयूष बदोनी व दीपक हुडा यांनी संयमी खेळ कताना लखनौला १० षटकांत ४ बाद ४७ धावांपर्यंत पोहोचवले. या सामन्यात दोन कट्टर वैरी एकाच संघातून खेळताना दिसत आहेत, एकेकाळी कृणाल पांड्याने ( Krunal Pandya) ज्याला करियर संपवण्याची धमकी दिली होती, त्या खेळाडूसाठी त्याला टाळ्या वाजवाव्या लागत आहेत.
गुजरातचा कर्णधार हार्दिक पांड्याने नाणेफेक जिंकून प्रथम गोलंदाजी करण्याचा निर्णय घेतला. मोहम्मद शमीने पहिल्याच चेंडूवर लखनौ सुपर जायंट्सना मोठा धक्का दिला. त्याने कर्णधार लोकेश राहुलची विकेट घेतली. शमीने टाकलेला अप्रतिम चेंडू लोकेशच्या बॅटची किनार घेत यष्टिरक्षक मॅथ्यू वेडच्या हाती विसावला. मैदानावरील अम्पायरने नॉट आऊट निर्णय दिल्यावर कर्णधार हार्दिकने त्वरित DRS घेतला आणि तो यशस्वी ठरला. २०१६नंतर लोकेश प्रथमच गोल्डन डक म्हणजे पहिल्याच चेंडूवर बाद झाला. २०१६मध्ये गुजरात लायन्स संघाच्या धवल कुलकर्णीनं त्याला पहिल्याच चेंडूवर बाद केले होते.
त्यानंतर क्विंटन डी कॉक ( ७) याचाही शमीने त्रिफळा उडवला. एक वर्षानंतर आयपीएलमध्ये पुनरागमन करणाऱ्या वरूण आरोनने लखनौला तिसरा धक्का दिला. एव्हिन लुईसला ( १०) त्याने बाऊन्सवर फटका मारण्यास भाग पाडले आणि शुबमन गिलने विरुद्ध दिशेने धाव घेत अफलातून झेल टिपला. लखनौचे ३ फलंदाज २० धावांवर माघारी परतले. मनीष पांडे व दीपक हुडा ही जोडी लखनौला सांभाळेल असे वाटत असताना शमीने आणखी एक धक्का दिला. मनीष ६ धावांवर त्रिफळाचीत झाला.
११व्या षटकात हार्दिक पांड्याने टाकलेल्या पहिल्याच चेंडूवर दीपक हुडाने ( Deepak Hooda) दमदार चौकार खेचला अन् डग आऊटमध्ये बसलेल्या कृणालला त्याच्यासाठी टाळ्या वाजवाव्या लागल्या. त्याच हुडाने ३६ चेंडूंत अर्धशतक झळकावले.
नेमकं वैर काय?सय्यद मुश्ताक अली ट्रॉफी ट्वेंटी-२० स्पर्धेत बडोदा संघ वादामुळे चर्चेत आला होता. संघातील टॉप खेळाडू दीपक हुडानं या स्पर्धेतून माघार घेतली होती आणि त्यानं कर्णधार कृणाल पांड्या ( Krunal Pandya) यानं सहकाऱ्यांसमोर शिवीगाळ केल्याचा आरोप केला होता. उप कर्णधार दीपक हुडानं बडोदा क्रिकेट असोसिएशनकडे लेखी तक्रार केली होती. वडोदरा येथील रिलायन्स स्टेडियमवर सराव करताना दीपक आणि कृणाल यांच्यात वाद झाला होता. त्यानंतर दीपकनं बडोदा क्रिकेट असोसिएशनला मेल करून कृणालनं शिवीगाळ केल्याचा आरोप केला. शिवाय त्यानं या स्पर्धेतून माघार घेत असल्याचेही सांगितले. दीपकनं ४६ प्रथम श्रेणी, ६८ लिस्ट ए आणि १२३ ट्वेंटी-20 सामने खेळले आहेत. दीपक हा इंडियन प्रीमिअर लीगमध्ये किंग्स इलेव्हन पंजाबचा सदस्य आहे.
Web Title: IPL 2022 T20 Match LSG vs GT Live Score card Updates : Krunal Pandya Clapping for Deepak Hooda, once was threatened to end his career, Deepak Hooda with an incredible fifty from 36 balls
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
