IPL 2023, Delhi Capitals vs Gujarat Titans Live : इंडियन प्रीमिअर लीग २०२३ मध्ये आज दिल्ली कॅपिटल्स त्यांच्या घरच्या मैदानावर गतविजेत्या गुजरात टायटन्सचा सामना करणार आहे. दिल्लीला पहिल्या सामन्यात हार पत्करावी लागली होती, तर गुजरातने विजयी सलामी दिली आहे. पण, घरच्या मैदानावर खेळताना दिल्लीचे पारडे जड मानले जात आहे. संघाचे मनोबल उंचावण्यासाठी रिषभ पंत ( Rishabh Pant) आजच्या सामन्यात स्टेडियमवर उपस्थित राहिला आहे. गुजरातने नाणेफेक जिंकून प्रथम गोलंदाजीचा निर्णय घेतला आणि चेंडू पहिल्यापासून सुरेख वळताना दिसला. मोहम्मद शमीने दुसऱ्याच चेंडूवर डेव्हिड वॉर्नरची ( David Warner) विकेट मिळवली होती, परंतु नशीबाने त्याची साथ दिली.
गुजरातने दुसऱ्यांदा फलंदाजी करताना ८ विजय मिळवले आहेत. दिल्लीने आजच्या सामन्यात अभिषेक पोरेलला पदार्पणाची कॅप दिली आहे. गुजरात टायटन्सने नाणेफेक जिंकून प्रथम गोलंदाजीचा निर्णय घेतला आहे. गुजरातच्या संघात दोन बदल पाहायला मिळत असून डेव्हिड मिलर आणि साई सुदर्शन यांना प्लेइंग इलेव्हनमध्ये संधी मिळाली आहे. केन विलियम्सन व विजय शंकर हे नाही खेळत आहेत. केन दुखापतीमुळे मायदेशी परतला आहे. दिल्लीनेही रोव्हमन पॉवेलच्याजागी एनरिच नॉर्खियाला संधी दिली आहे.
मोहम्मद शमीचे चेंडू सुरुवातीपासूनच अप्रतिम वळत होते आणि दुसऱ्या चेंडू वॉर्नरची बॅट चकवून यष्टीरक्षक वृद्धीमान साहाच्या हाती विसावला. चेंडू पास होताना कसला तरी आवाज झाला अन् अपील झाले. साहा कर्णधार हार्दिकला सांगत होता की चेंडू बॅटला नाही यष्टीला लागला आहे. पण, वॉर्नरचे नशीब एवढे बलवत्तर की चेंडू यष्टिंना घासूनही बेल्स पडल्या नाही अन् वॉर्नर नाबाद राहिला. पण, पृथ्वी शॉने पुन्हा निराश केले. ७ धावांवर शमीच्या गोलंदाजीवर तो झेलबाद झाला आणि त्यानंतर शमीने मिचेल मार्शचाही ( ४) त्रिफळा उडवला. दिल्लीला ३७ धावांवर दुसरा धक्का बसला.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"