IPL 2023, Mumbai Indians vs Punjab Kings Live Marathi : मुंबई इंडियन्स आणि पंजाब किंग्स यांच्यातला वानखेडे स्टेडियमवरील सामना जबरदस्त चुरशीचा झाला. पंजाबने अखेरच्या ६ षटकांत १०६ धावा चोपून मुंबईसमोर २१५ धावांचे तगडे लक्ष्य ठेवले. रोहित शर्मा, कॅमेरून ग्रीन, सूर्यकुमार यादव आणि टीम डेव्हिड यांनी ज्या प्रकारे खेळ केला, ते पाहून मुंबईचा विजय पक्का, हेच MI फॅनच्या मनात होते. पण, अर्शदीप सिंगने ( Arshdeep Singh) अखेरच्या षटकात मुंबईकरांच्या स्वप्नांचा चेंदा-मेंदा केला. त्याचे ते दोन चेंडू मॅचला कलाटणी देऊन केले अन् अम्पायर्सना कामाला लावणारे ठरले. तिलक वर्मा व नेहाल वधेरा यांचा अर्शदीपने मधला स्टम्प उडवला. नुसता उडवला नाही तर त्याचे दोन तुकडेच झाले... हे तुकडे होताना पाहून मुंबईचे फॅन्स मात्र रडू लागले.
सॅम करन ( ५५) व हरप्रीत भाटीया ( ४१) या दोघांनी मुंबईच्या गोलंदाजांना धू धू धुतले व ९२ धावांची भागीदारी केली. पंजाबने अखेरच्या ६ षटकांत १०६ धावा कुटल्या. मॅथ्यू शॉर्ट ( ११), प्रभसिमरन सिंग ( २५) व अथर्व तायडे( २९) हे माघारी परतले होते. पंजाबने ८ बाद २१४ धावांचा डोंगर उभा केला. इशान किशन ( १) लगेच माघारी परतला. कॅमेरून ग्रीन आणि रोहित शर्मा ( ४४) यांनी MIची खिंड लढवताना ७६ धावांची भागीदारी केली. सूर्यकुमार यादवने ग्रीनसह ३६ चेंडूंत ७५ धावांची भागीदारी केली. ग्रीनने ४३ चेंडूंत ६७ धावा ( ६ चौकार व ३ षटकार) चोपल्या. सूर्यकुमारने फटकेबाजी कायम राखताना २६ चेंडूंत ७ चौकार व ३ षटकारांसह ५७ धावा केल्या.
![]()
टीम डेव्हिड १३ चेंडूंत २५ धावांवर खेळत होता. ६ चेंडूंत १६ धावा असा असताना डेव्हिडने एक धाव घेत तिलक वर्माला स्ट्राईक दिली. अर्शदीपने तिसऱ्या चेंडूवर तिलकचा त्रिफळा उडवला. त्याच्या चेंडूचा वेग इतका होता की मधल्या स्टम्प्सचे दोन तुकडे झाले. पुढच्याच चेंडूवर भन्नाट यॉर्कर टाकून अर्शदीपने नेहाल वधेराच्या स्टम्पचे दोन तुकडे केले. मुंबईला ६ बाद २०१ धावा करता आल्या अन् पंजाबने १३ धावांनी सामना जिंकला. अर्शदीपने ४-०२९-४ अशी जबरदस्त गोलंदाजी केली.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"
Web Title: IPL 2023, MI vs PBKS Live Marathi : Arshdeep Singh to break the middle stump on 2 consecutive deliveries, Watch Video
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
