IPL 2024, Lucknow Super Giants vs Gujarat Titans Live Update : उमेश यादव व दर्शन नळकांडे यांनी लखनौ सुपर जायंट्सला योग्यवेळी डबल धक्के देताना गुजरात टायटन्सला पकड मिळवून दिली. लोकेश राहुल व मार्कस स्टॉयनिस यांनी LSG चा डाव सावरला होता, परंतु GT च्या गोलंदाजांनी त्यांच्या धावगतीवर अंकुश ठेवले होते. आयुष बदोनी व निकोलस पूरन यांनी अखेरच्या षटकांत योगदान देताना लखनौला सन्मानजनक धावसंख्या उभारून दिली.
विजयाची हॅटट्रिक साजरी करण्यासाठी लखनौ सुपर जायंट्सचा संघ घरच्या मैदानावर गुजरात टायटन्सचा सामना करतोय.. LSG ने नाणेफेक जिंकून प्रथम फलंदाजीचा निर्णय घेतला. आज पाचवा सामना खेळणाऱ्या GT ला २ विजय व २ पराभव अशा निकालांना सामोरे जावे लागले आहे. क्विंटन डी कॉकने षटकाराने त्याचे खाते उघडले खरे, परंतु चौथ्या चेंडूवर उमेश यादवने त्याला माघारी पाठवले. देवदत्त पडिक्कल ( ७ ) पुन्हा अपयशी ठरला. ही विकेटही उमेशने मिळवून दिली. मार्कस स्टॉयनिस व कर्णधार लोकेश राहुल यांनी LSG ला पहिल्या सहा षटकांत ४७ धावांपर्यंत पोहोचवले. KL Rahul ने आजच्या खेळीमुळे लखनौकडून हजार धावा पूर्ण करण्याचा पहिला मान पटकावला.