IPL 2024 Mumbai Indians vs Chennai Super Kings Live Marathi : मुंबईच्या वानखेडे स्टेडियमवर पैसा वसूल खेळ पाहायला मिळाला. चेन्नई सुपर किंग्सच्या डावातील महेंद्रसिंग धोनीने खेळलेली ती शेवटची ४ चेंडू अन् त्यानंतर रोहित शर्माचे शतक... या सामन्यात क्रिकेट प्रेमींना सर्वकाही मिळाले. त्यामुळेच या सामन्यात कोण जिंकलं, कोण हरलं यापेक्षा दोन दिग्गजांच्या खेळीने बाजी मारली हे महत्त्वाचे ठरले. CSK च्या २०६ धावांचा पाठलाग करताना मुंबई इंडियन्सने सुरुवात दमदार केली होती. पण, सातव्या षटकानंतर मथिशा पथिराणाने ( Matheesha Pathirana) सामना फिरवला. त्याने त्याच्या पहिल्याच षटकात दोन धक्के दिले, तरीही Rohit Sharma मैदानावर शड्डू ठोकून उभा होता. पण, आजचा दिवस पथिराणाचा होता. त्याने २८ धावांत ४ विकेट्स घेतल्या.
५०० पार! Rohit Sharma ठरला आशियाई किंग; नोंदवले ट्वेंटी-२०तील सहा मोठे विक्रम
इशान किशन आणि रोहित शर्मा यांनी मुंबईला अपेक्षित आक्रमक सुरुवात करून दिली. दोघांनी ७ षटकांत ७० धावा जोडल्या. मथिशा पथिराणाने त्याच्या पहिल्या षटकाच्या पहिल्या चेंडूवर इशानला ( २३) माघारी पाठवले. त्याच षटकात पथिराणाच्या बाऊन्सरवर सूर्यकुमार यादवने अपर कट मारला खरा, परंतु मुस्ताफिजूर रहमानने चतुराईने झेल टिपला. रोहित शर्मा मैदानावर उभा राहिला आणि त्याने या पर्वातील त्याचे पहिले अर्धशतक पूर्ण केले. ट्वेंटी-२० क्रिकेटमध्ये १००० हून अधिक चौकार व ५०० हून अधिक षटकार खेचणारा रोहित शर्मा हा जगातील दुसरा फलंदाज आहे. ख्रिस गेलने ११३२ चौकार व १०५६ षटकार खेचले आहेत, तर रोहितच्या नावावर १०२५* चौकार व ५००* षटकार आहेत.
रोहितने चौकार खेचून ६१ चेंडूंत शतक पूर्ण केले. पण, २ चेंडूंत २५ धावा अशक्य होत्या. चेन्नईने हा सामना २० धावांनी जिंकला. मुंबईला ६ बाद १८६ धावा करता आल्या. रोहित ६३ चेंडूंत ११ चौकार व ५ षटकारांसह १०५ धावांवर नाबाद राहिला.