कोलंबो : मुंबईच्या जेमिमा रॉड्रीग्जच्या अर्धशतकी खेळाच्या जोरावर भारतीय महिला क्रिकेट संघाने पाच सामन्यांच्या ट्वेंटी-20 मालिकेत श्रीलंकेवर पाच विकेट राखून विजय मिळवला. तिसऱ्या सामन्यातील या विजयासह भारताने मालिकेत 2-0 अशी आघाडी घेतली आहे. दुसरा सामना पावसामुळे रद्द करण्यात आला होता. जेमिमाचे 12 व्या ट्वेंटी-20 सामन्यातील हे दुसरे अर्धशकत ठरले.
जेमिमाने पहिल्या सामन्यात 15 चेंडूंत 36 धावांची तुफानी खेळी केली होती. तोच फॉर्म कायम राखताना तिने शनिवारी 40 चेंडूंत 57 धावा चोपल्या. श्रीलंकेच्या 8 बाद 131 धावांचा पाठलाग करताना भारताने पाच विकेट आणि दहा चेंडू राखून विजय मिळवला.