रावळपिंडी : पाकिस्तान आणि इंग्लंड यांच्यातील पहिला कसोटी सामना आज पार पडला. आज पहिल्या कसोटी सामन्यातील अखेरचा दिवस पार पडला. पाचव्या दिवशी यजमान पाकिस्तानी संघाने शानदार सुरूवात करून सामन्यात पकड बनवली होती. मात्र अखेरच्या सत्रात इंग्लंडने पुनरागमन केले आणि 74 धावांनी मोठा विजय मिळवला. सामन्याच्या पहिल्या दिवशी इंग्लिश संघाने शानदार फलंदाजी करून यजमान संघाला धु धु धुतले होते. इंग्लंडने आपल्या पहिल्या डावात 101 षटकांत सर्वबाद 657 धावांची विशाल धावसंख्या उभारली होती. यामध्ये इंग्लंडच्या 4 खेळाडूंनी शतकी खेळी नोंदवली. मात्र पाकिस्तानने देखील त्यांच्या डावात शानदार खेळी करून सामन्यात पकड मजबूत केली होती. मात्र अखेरच्या सत्रात इंग्लिश संघाने शानदार पुनरागमन करून कसोटी मालिकेत विजयी सलामी दिली.
पहिल्या डावात इंग्लिश संघाने यजमानांना धुतले
दरम्यान, इंग्लिश संघाच्या सलामीवीरांनी आपल्या पहिल्या डावात पहिल्या बळीसाठी तब्बल 233 धावांची भागीदारी नोंदवली होती. जॅक क्राऊलीने 111 चेंडूंमध्ये 21 चौकारांच्या मदतीने 122 धावा केल्या. याशिवाय त्याने इंग्लंडकडून सलामीवीर म्हणून सर्वात जलद शतक ठोकण्याचा विक्रम देखील केला. यानंतर डकेटने 110 चेंडूंमध्ये 107 धावा, तर ओली पोपने 104 चेंडूंमध्ये 108 धावा आणि हॅरी ब्रुक्सने 81 चेंडूंचा सामना करत 14 चौकार आणि 2 षटकारांच्या मदतीने नाबाद 101 धावा केल्या. याशिवाय कर्णधार बेन स्टोक्सने 15 चेंडूंचा सामना करत 6 चौकार आणि एका षटकाराच्या मदतीने 34 नाबाद धावा केल्या. ब्रुक्सने एका षटकामध्ये 6 चौकारही ठोकले.
दुसऱ्या दिवशी पाकिस्तानी गोलंदाजांचे पुनरागमन
पाकिस्तानने पहिल्या दिवशी दुसऱ्या आणि तिसऱ्या सत्रात 3 बळी घेऊन पुनरागमन केले होते. परंतु क्राऊली आणि डकेटने 233 धावांची भागीदारी केली. जाहिद महमूदने १६० धावांवर दोन गडी, तर हॅरिस रौफने 78 धावा देत 1 गडी बाद केला. तर मोहम्मद अलीने 17 षटकांमध्ये 96 धावा देऊन 1 गडी बाद केला. मात्र दुसऱ्या दिवशी यजमान संघाने शानदार पुनरागमन केले आणि इंग्लंडला 657 धावांवर रोखले. पाकिस्तानकडून झाहिद महमूदने सर्वाधिक 4 बळी पटकावले, तर नसीम शाहने 3 बळी घेतले. याशिवाय मोहम्मद अली (2) आणि हॅरिस रौफला (1) बळी घेण्यात यश आले.
इंग्लिश गोलंदाजही विकेटसाठी तरसले
पाकिस्तानी संघाच्या सलामीवीरांनी आपल्या पहिल्या डावात दुसऱ्या दिवसाअखेर 51 षटकांत 181 धावांची भागीदारी नोंदवली. अब्दुल्ला शफीक 158 चेंडूत 89 धावांवर नाबाद आहे, तर इमाम-उल-हक 148 चेंडूत 90 धावा करून खेळपट्टीवर टिकून राहिले. खरं तर दुसऱ्या दिवसाअखेर कोणत्याच इंग्लिश गोलंदाजाला बळी घेण्यात यश आले नाही. त्यामुळे पाकिस्तानच्या दोन्हीही सलामीवीरांनी आपल्या शतकी खेळीकडे कूच केली होती. तिसऱ्या दिवशी देखील पाकिस्तानी फलंदाजांनी शानदार खेळी केली आणि सलामीवीरांनी आपले शतक पूर्ण केले. पहिल्या डावात पाकिस्तानकडून अब्दुला शफीक (114), इमाम उल हक (121) आणि बाबर आझम (136) या तिघांनी शतक झळकावले. याशिवाय आघा सलमानने 53 धावांची अर्धशतकी खेळी करून सामन्यात पुनरागमन केले. पाकिस्तानने आपल्या पहिल्या डावात सर्वबाद 579 धावा केल्या होत्या. इंग्लंडच्या विल जॅक्सने सर्वाधिक 6 बळी घेऊन यजमानांना मोठे धक्के दिले. यासह इंग्लिश संघाने 78 धावांची आघाडी घेतली होती.
इंग्लंडने 247 धावांवर डाव केला घोषित
दुसऱ्या डावात देखील इंग्लिश संघाने शानदार कामगिरी करून 7 बाद 247 धावांवर डाव घोषित केला. मात्र दुसऱ्या डावात कोणत्याच इंग्लिश खेळाडूला शतकी खेळी करता आली नाही. सलामीवीर जॅक क्राऊलीने 48 चेंडूत 50 धावांची अर्धशतकी खेळी केली. तर जो रूट (73) आणि हॅरी ब्रुक (87) धावा करून बाद झाला. याशिवाय कोणत्याच फलंदाजाला मोठी खेळी करता आली नाही. इंग्लिश संघाने 264+78 धावा अशा मिळून यजमानांना 343 धावांचे तगडे आव्हान दिले होते. ज्याचा पाठलाग करताना पाकिस्तानला अपयश आले.
पाकिस्तानी संघ दुसऱ्या डावात सुरूवातीपासूनच सावध खेळी करत होता. कारण इंग्लंडच्या संघाने विजयी सलामी देण्याच्या दृष्टीकोनातून डाव घोषित केला होता. तरीदेखील पाकिस्तानी संघाने चौथ्या दिवसाअखेर आपल्या कर्णधारासह आणखी एक गडी गमावला. अब्दुल्ला शफीक (6) आणि बाबर आझम (4) धावा करून तंबूत परतले. तर चौथ्या दिवसाअखेर इमाम उल हक (43) आणि सौद शकील (24) धावा करून खेळपट्टीवर टिकून होते. पाकिस्तानी संघाला अखेरच्या दिवशी विजयासाठी 263 धावा करायच्या होत्या. तर इंग्लिश संघाला मालिकेत विजयी सलामी देण्यासाठी 8 गडी बाद करण्याची आवश्यकता होती.
पाकिस्तानने हातचा सामना गमावला
सामन्याच्या अखेरच्या दिवशी यजमान संघाने शानदार सुरूवात केली. चौथ्या दिवसाअखेर नाबाद राहिलेले इमाम उल हक (48) आणि सौद शकील (76) धावा करून बाद झाले. लक्षणीय बाब म्हणजे सौद शकील आणि मोहम्मद रिझवान यांनी शानदार भागीदारी नोंदवून विजयाकडे कूच केली. मात्र अखेरच्या सत्रात इंग्लिश गोलंदाजांनी जोरदार पुनरागमन करून सामन्याचा निकाल फिरवला. इंग्लंडकडून 40 वर्षीय जेम्स ॲंडरसनने आणि ओली रॉबिन्सन यांनी सर्वाधिक 4-4 बळी पटकावले, तर कर्णधार बेन स्टोक्सला 1 बळी घेण्यात यश आले. तर जॅक लीचने महत्त्वाचा शेवटचा 1 बळी घेतला.
इंग्लंडने दिली विजयी सलामी
खरं तर पाकिस्तानला विजयासाठी अखेरच्या सत्रात 86 धावांची आवश्यकता होती. SalmanAliAgha1 आणि AzharAli यांनी शानदार भागीदारी नोंदवली. इंग्लंडचा दिग्गज जेम्स ॲंडरसनने पहिल्या कसोटीत 4 बळी पटकावून कसोटी कारकिर्दीतील एकूण 671 बळी घेण्याचा आकडा गाठला. पाकिस्तानला शेवटच्या सत्रात 86 तर इंग्लंडचा 5 बळींची आवश्यकता होती. सामना पूर्णपणे पाकिस्तानच्या ताब्यात होता कारण त्यांच्याकडे 40 षटकांचा अवधी देखील होता. मात्र इंग्लिश गोलंदाजांनी शानदार गोलंदाजी करून विजयी सलामी दिली. इंग्लंडचा फिरकीपटू जॅक लीचने नसीम शाहला एलबीडब्ल्यू बाद करून इंग्लिश संघाच्या विजयावर शिक्कामोर्तब केला. इंग्लंडने 268 धावांवर यजमानांना गुंडाळून 74 धावांनी मोठा विजय मिळवला.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"
Web Title: PAK vs ENG Test Live England beat Pakistan by 74 runs in the first Test, with James Anderson and Ollie Robinson taking 4 wickets each
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
