Pat Cummins Shivam Mavi Super Relay Catch, IPL 2022 RR vs KKR Live: राजस्थान रॉयल्सने (Rajasthan Royals) सलामीवीर जोस बटलरच्या शतकाच्या बळावर कोलकाता विरूद्ध २१७ धावा कुटल्या. जोस बटलरने १०३ धावांची दमदार खेळी केली. तर देवदत्त पडिकल, संजू सॅमसन आणि शिमरॉन हेटमायर यांनीही मोठी धावसंख्या उभारण्यात मोलाची भर घातली. रियान परागनेही मोठा फटका खेळला होता, पण एका अप्रतिम कॅचमुळे तो बाद झाला. पॅट कमिन्स आणि शिवम मावीने एकत्रितपणे तो झेल टिपला.
राजस्थानच्या डावात देवदत्त पडिकल २४ धावांवर त्रिफळाचीत झाला. त्यानंतर संजू सॅमसन १९ चेंडूत ३८ धावांची खेळी करून बाद झाला. त्याने ३ चौकार आणि २ षटकार लगावले. जोस बटलरने दमदार फलंदाजी करत ५९ चेंडूत शतक ठोकले. तो ६१ चेंडूत १०३ धावांवर बाद झाला. जोस बटलरने तुफान फटकेबाजी करत ९ चौकार आणि ५ षटकारांनी आपली खेळी सजवली. बटलर बाद झाल्यानंतर रियान पराग मैदानात आला. त्याने हवेत फटका मारला. तो फटका आधी पॅट कमिन्सने बाऊंडरीवर अडवला, पण त्याचा तोल जात असल्याने त्याने चेंडू आतमध्ये फेकला. शिवम मावीने शानदार उडी मारत झेल पूर्ण केला. पाहा व्हिडीओ-
त्यानंतर शेवटच्या टप्प्यात शिमरॉन हेटमायरने तुफानी खेळी करत संघाला मोठी धावसंख्या गाठून दिली. त्याने १३ चेंडूत २ चौकार आणि २ षटकारांच्या मदतीने नाबाद २६ धावा केल्या.