नवी दिल्ली : शुबमन गिलने आयपीएलमध्ये (IPL 2023) आपले दुसरे शतक झळकावून विराट आर्मीला बाहेरचा रस्ता दाखवला. गुजरात टायटन्सने १९९ धावांचे तगडे आव्हान १९.१ षटकांतच गाठले अन् ५ चेंडू आणि ६ गडी राखून विजय साकारला. विराट कोहली आणि शुबमन गिल या दोन्ही भारतीय शिलेदारांनी शतक ठोकून सामना अविस्मरनीय केला. पण गिलच्या शतकामुळे मुंबई इंडियन्सने प्लेऑफमध्ये धडक मारली, तर आरसीबीचे आव्हान संपुष्टात आले. आरसीबीच्या पराभवानंतर शुबमन गिलच्या बहिणीला सोशल मीडियावर शिवीगाळ केली जात आहे.
सोशल मीडियावर काही चाहत्यांनी शुबमनची बहिण शहनील गिलसाठी अपशब्द वापरले, ज्याची चर्चा होत आहे. यावर गिलचे चाहते आणि क्रिकेटप्रेमी देखील प्रत्युत्तर देऊन टीकाकारांना सुनावत आहेत. खरं तर गुजरात टायटन्सच्या विजयानंतर गिलच्या बहिणीने सोशल मीडियावर एक पोस्ट केली होती, या पोस्टवर चाहते आक्षेपार्ह कमेंट करत आहेत.
विराट कोहलीच्या शतकावर शुबमन गिलचे शतक भारी पडल्याचे दिसले. आपल्या संघाच्या पराभवानंतर आरसीबीच्या काही चाहत्यांनी गिलच्या बहिणीवर निशाणा साधला. लक्षणीय बाब म्हणजे शहनील गिलने काही दिवसांपूर्वी गुजरात विरूद्ध लखनौच्या सामन्यातील फोटो पोस्ट केले होते. हे फोटो शेअर करताना तिने कॅप्शनमध्ये लिहले होते, "काय अप्रतिम दिवस होता." काही चाहते याच पोस्टवर शुबमन आणि त्याच्या बहिणीवर आक्षेपार्ह कमेंट करत आहेत.
गिलच्या शतकामुळे मुंबईची प्लेऑफमध्ये धडक
गुजरातविरूद्धचा सामना रॉयल चॅलेंजर्स बंगळुरूसाठी 'करा किंवा मरा' असा होता. गतविजेत्यांना पराभूत करून प्लेऑफमध्ये स्थान मिळवण्याचे आव्हान विराट आर्मीसमोर होते. पण गुजरातने आपला विजयरथ कायम ठेवून आरसीबीला बाहेरचा रस्ता दाखवला अन् मुंबई इंडियन्सने प्लेऑफमध्ये स्थान मिळवले. आरसीबीने दिलेल्या १९९ धावांच्या मोठ्या आव्हानाचा पाठलाग करताना शुबमन गिलने १०४ धावांची नाबाद शतकी खेळी करून गुजरातला विजय मिळवून दिला.
Web Title: Royal Challengers Bangalore fans abused Gill's sister Shahneel Gill on social media after Shubman Gill scored a century in gt vs rcb match in IPL 2023
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
