पंजाब किंग्जच्या (Punjab Kings) फलंदाजांनी मुंबई इंडियन्सच्या (Mumbai Indians) गोलंदाजांची तुफान धुलाई केली. कर्णधार मयंक अग्रवाल, सलामीवीर शिखर धवन यांची अर्धशतके आणि युवा फलंदाज जितेश शर्माची फटकेबाजी याच्या बळावर पंजाबने मुंबईला १९९ धावांचे आव्हान दिले. सलामी जोडीच्या ९७ धावांच्या भागीदारीच्या वेळी पंजाब २०० पार सहज मजल मारेल अशी अपेक्षा होती. पण मुंबईच्या गोलंदाजांनी १२व्या षटकानंतर केलेल्या शिस्तबद्ध गोलंदाजीमुळे पंजाबला द्विशतकी मजल मारता आली नाही.
प्रथम फलंदाजी करताना पंजाबच्या सलामीवीरांनी मुंबईच्या गोलंदाजांचा खरपूस समाचार घेतला. कर्णधार मयंक अग्रवाल आणि शिखर धवन दोघांनीही अर्धशतके ठोकली. मात्र शतकी सलामी देण्यास त्यांची जोडी ३ धावांनी कमी पडली. मयंक अग्रवाल ३२ चेंडूत ६ चौकार आणि २ षटकारांच्या मदतीने ५२ धावा करून बाद झाला. पाठोपाठ जॉनी बेअरस्टो १२, लियम लिव्हिंगस्टोन २ धावा काढून माघारी परतला. शिखर धवनने मात्र ५० चेंडूत ५ चौकार आणि ३ षटकारांच्या सहाय्याने ६० धावांची शानदार खेळी केली. याशिवाय शेवटच्या टप्प्यात जितेश शर्माने (३०*) फटकेबाजी करत पंजाबला मोठी धावसंख्या उभारून दिली.
मुंबईकडून बेसिल थंपीने २ तर उनाडकट, बुमराह आणि मुरूगन अश्विनने १ बळी टिपला. आजच्या सामन्यासाठी संधी देण्यात आलेल्या टायमल मिल्स मात्र एकही गडी बाद करता आला नाही. विशेष म्हणजे, सर्व फलंदाजांनी आपापली ४ षटके पूर्ण केली. त्यात जसप्रीत बुमराहला सर्वात कमी मार (२८ धावा) पडला.
Web Title: Shikhar Dhawan Mayank Agarwal Fifties Punjab Kings give 199 runs Target to Mumbai Indians IPL 2022 MI vs PBKS Live Updates
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
