ICC women’s cricketer of the year - भारताच्या स्मृती मानधनानं ( Smriti Mandhana) वर्षातील सर्वोत्तम महिला क्रिकेटपटूला दिला जाणारा राचेल हेयहो फ्लिंट ट्रॉफी ( Rachael Heyhoe Flint Trophy ) पटकावली. आयसीसीनं 2021च्या पुरस्काराची घोषणा सोमवारी केली. त्यात पुरुष वन डे क्रिकेटपटूचा पुरस्कार बाबर आजमन, तर सर्वात्तम कसोटी खेळाडूचा पुरस्कार जो रुटनं पटकावला. 2021च्या आयसीसी पुरस्कारांमध्ये आर अश्विन वगळता एकाही पुरुष भारतीय खेळाडूला नामांकन मिळालेलं नाही. त्यात स्मृतीनं हा पुरस्कार पटकावून भारतीय क्रिकेटची लाज राखली. तीनं 2021मध्ये 22 आंतरराष्ट्रीय सामन्यांत 38.86च्या सरासरीनं 855 धावा केल्या आहेत. त्यात एक शतक व 5 अर्धशतकांचा समावेश आहे. 2018मध्येही तिनं हा पुरस्कार पटकावला होता.
स्मृतीनं आयसीसीनं जाहीर केलेल्या २०२१ वर्षातील सर्वोत्तम ट्वेंटी-२० संघातही स्थान पटकावले आहे. इंग्लंडच्या नॅट शिव्हरनं ( Nat Sciver) या संघाचे कर्णधारपद पटकावले आहे. या अव्वल ११ खेळाडूंमध्ये स्थान पटकावणारी
स्मृती मानधना ( Smriti Mandhana) ही एकमेव भारतीय खेळाडू आहे. या संघात इंग्लंडच्या सर्वाधिक पाच खेळाडूंना स्थान मिळाले आहे. नॅट शिव्हरसह टॅमी ब्यूमॉन्ट, डॅनी व्हॅट, एमी जोन्स आणि सोफी एकलेस्टोन या इंग्लंडच्या खेळाडूंचा समावेश आहे. दक्षिण आफ्रिकेच्या शबनिम इस्माइल, लॉरा वूलवॉर्ट व मारियन कॅप यांचा समावेश आहे. याशिवाय आयर्लंडची गॅबी लुईस व झिम्बाब्वेची लॉरिन फिरी याही या संघात आहेत.
आश्चर्याची गोष्ट म्हणजे ट्वेंटी-२० वर्ल्ड कप स्पर्धेतील विजेत्या ऑस्ट्रेलियाच्या एकाही खेळाडूचा या संघात समावेश नाही. स्मृती मानधनानं २०२१मध्ये भारताकडून सर्वाधिक धावा केल्या आहेत. तिनं ३१.८७च्या सरासरीनं २५५ धावा केल्या आहेत. त्यामुळेच तिची सलामीवीर म्हणून निवड केली गेली आहे.
Web Title: Smriti Mandhana wins the Rachael Heyhoe Flint Trophy for the ICC Women’s Cricketer of the Year
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
