दक्षिण आफ्रिकेचा महान गोलंदाज डेल स्टेन यानं मंगळवारी सर्व प्रकारच्या क्रिकेटमधून निवृत्ती जाहीर केली. ''ज्या खेळावर मी भरभरून प्रेम केलं, त्याच्यापासून अधिकृतपणे निवृत्ती घेण्याची हीच योग्य वेळ आहे,''असे ट्विट करून त्यानं ही निवृत्ती जाहीर केली. ( Dale Steyn has announced his retirement from all forms of the game). दक्षिण आफ्रिकेच्या या सुपरस्टार जलदगती गोलंदाजानं जगभरातील भल्याभल्या फलंदाजांची भंबेरी उडवली आहे. इंडियन प्रीमिअर लीगमध्येही ( IPL) विराट कोहलीच्या रॉयल चॅलेंजर्स बँगळुरू ( RCB) संघाचा सदस्य होता.
फेब्रुवारी २०२०मध्ये ऑस्ट्रेलियाविरुद्ध तो अखेरचा आंतरराष्ट्रीय ट्वेंटी-२० सामना खेळला होता. पण, मागील काही वर्ष त्याला दुखापतीमुळेच विश्रांती घ्यावी लागली. २०१६मध्ये ऑस्ट्रेलिया दौऱ्यावर त्याचा खांदा दुखावला होता. डेल स्टेननं मागच्या वर्षी आयपीएलमधून माघार घेतली होती, परंतु तो पाकिस्तान सुपर लीगमध्ये खेळला होता. ३ मार्च २०२१ला त्यानं कारकिर्दीतील अखेरची मॅच खेळली.