Vijay Hazare Trophy : स्टार खेळाडूंचा भरणा; महिन्याभरात १३५ सामन्यांची मेजवानी? जाणून घ्या सविस्तर

 वनडे फॉर्मेटमध्ये खेळवण्यात येणाऱ्या या स्पर्धेत  ३८ संघांचा समावेश आहे. भारतीय संघातील अनेक स्टार क्रिकेटर या स्पर्धेत खेळताना दिसणार आहेत.  

Vijay Hazare Trophy 2024-25 : देशांतर्गत क्रिकेटमधील लोकप्रिय आणि प्रतिष्ठित अशा विजय हजारे ट्रॉफी स्पर्धा २१ डिसेंबर २०२४ ते १८ जानेवारी २०२५ या कालावधीत खेळवण्यात येणार आहे. प्रत्येकी ५०-५० षटकांच्या सामन्यांच्या अर्थात देशांतर्गत स्पर्धेतील  वनडे फॉर्मेटमध्ये खेळवण्यात येणाऱ्या या स्पर्धेत  ३८ संघांचा समावेश आहे. भारतीय संघातील अनेक स्टार क्रिकेटर या स्पर्धेत खेळताना दिसणार आहेत.  

महिन्याभरात १३५ सामने; अनेक स्टार खेळाडू उतरणार मैदानात

जवळपास महिनाभर चालणारी ही स्पर्धा राऊंड-रॉबिन फॉरमॅटमध्ये खेळवण्यात येणार आहे. १७ वेगवेगळ्या ठिकाणी  या स्पर्धेतील १३५ सामने खेळवण्यात येतील. स्पर्धेत सहभागी संघांची पाच गटात विभागणी करण्यात आली असून ९ जानेवारी, २०२५ पासून या स्पर्धेतील बाद फेरीतील लढतींना सुरुवात होणार आहे.  आगामी चॅम्पियन्स ट्रॉफी स्पर्धेच्या दृष्टीने देखील भारतीय क्रिकेटर्ससाठी ही स्पर्धा खूपच महत्त्वपूर्ण असेल. या स्पर्धेत चमकदार कामगिरी करून कोण-कोणते खेळाडू टीम इंडियात एन्ट्री मारणार? ते पाहण्याजोगे असेल.  

कोणत्या गटात कोणता संघ?

गट अ (हरियाणा, गुजरात, उत्तराखंड, ओडिशा, झारखंड, गोवा, आसाम, मणिपूर) 
गट ब (राजस्थान, महाराष्ट्र, सेवा, रेल्वे, हिमाचल प्रदेश, आंध्र प्रदेश, मेघालय, सिक्कीम)
गट क (कर्नाटक, मुंबई, हैदराबाद, सौराष्ट्र, पंजाब, पाँडेचेरी, अरुणाचल प्रदेश, नागालँड)
गट ड (तामिळनाडू, विदर्भ, उत्तर प्रदेश, छत्तीसगड, चंदीगड, जम्मू आणि काश्मीर, मिझोराम)
गट ई (बंगाल, केरळ, त्रिपुरा, मध्य प्रदेश, दिल्ली, बडोदा, बिहार).

कुठं पाहता येतील सामने?

विजय हजारे ट्रॉफी २०२४-२५ या हंगामातील सामने Sports18 नेटवर्क टीव्ही चॅनेलवर थेट प्रक्षेपित केले जाणार आहेत. याशिवाय जिओ सिनेमा आणि फॅनकोड ॲप आणि वेबसाइटवरील स्ट्रीमिंगच्या माध्यमातून क्रिकेट चाहते या सामन्यांचा आनंद घेऊ शकतात.