Asia Cup 2023 India vs Pakistan: आगामी आशिया कप स्पर्धा वन डे वर्ल्ड कपआधी ५० षटकांच्या फॉरमॅटसाठी उपखंडातील गोलंदाजांच्या तयारीची चाचणी घेईल, असे पाकिस्तानचा महान वेगवान गोलंदाज वसीम अक्रमने म्हटले आहे. आशिया चषकाची सुरुवात बुधवारी मुलतानमध्ये पाकिस्तान आणि नेपाळ यांच्यातील पहिल्या सामन्याने होत आहे, परंतु सर्वांच्या नजरा 2 सप्टेंबर रोजी कँडीमध्ये भारत आणि पाकिस्तान यांच्यातील सामन्यावर असतील. अक्रम एका कार्यक्रमादरम्यान म्हणाला, "भारत असो किंवा पाकिस्तान किंवा श्रीलंका, प्रत्येकाला हे तपासायचे आहे की गोलंदाज 10 षटके टाकण्यास सक्षम आहेत की नाही कारण आजकाल त्यांना प्रत्येक सामन्यात चार षटके टाकण्याची सवय लागली आहे." यावेळी त्याने एका संघाबाबत भारत-पाकिस्तानला सावध केले.
"एसीसीने (एशियन क्रिकेट कौन्सिल) 50 षटकांच्या फॉरमॅटमध्ये आशिया चषक आयोजित करणे ही चांगली कल्पना आहे कारण त्यानंतर लगेचच विश्वचषक आयोजित केला जाईल," अक्रमने कोणत्याही संघाला आवडता संघ म्हणण्यास नकार दिला, पण प्रत्येक संघासाठी मार्ग सोपा नसेल असे भाकित केले. “गेल्या वेळी आम्ही भारत आणि पाकिस्तान यांच्यातील फायनलची भविष्यवाणी केली होती, पण श्रीलंकेने ही स्पर्धा जिंकली. तिन्ही संघ धोकादायक आहेत आणि त्यापैकी कोणताही एक संघ जिंकू शकतो. इतर संघही सहभागी होत आहेत. गेल्या वेळी श्रीलंकेने जेतेपद पटकावले होते आणि भारताला अंतिम फेरीतही पोहोचता आले नव्हते.
या संघाला कमी लेखू शकत नाही...
अक्रम म्हणाला, 'भारत आणि पाकिस्तान यांच्यातील सामना महत्त्वाचा आहे. आम्हाला माहित आहे की बरेच लोक ते पाहतात परंतु इतर संघ देखील येथे खेळण्यासाठी आले आहेत आणि तुम्ही श्रीलंका किंवा बांगलादेशला कमी लेखू शकत नाही. आशिया चषकासाठी भारताने संतुलित संघ निवडला असल्याचे अक्रमने सांगितले. तो म्हणाला, 'मला वाटते की तो वेगवेगळ्या गोष्टींचा प्रयत्न करत आहे, विशेषत: टी-20 फॉरमॅटमध्ये नवीन खेळाडूंना संधी देत आहे आणि त्याच्याकडे एक नवीन कर्णधारही आहे. त्यांचा संघ संतुलित आहे पण भारत किंवा इतर कोणत्याही संघासाठी हे काम सोपे नाही.