IPL 2022 Rajasthan Royals vs Royals Challengers Banglore : रॉयल चॅलेंजर्स बंगळुरू विरुद्ध राजस्थान रॉयल्स सामना अखेरच्या षटकापर्यंत रंगला. चुरशीच्या लढतीत राजस्थाननं बंगळुरूला नमवलं. पण यावेळी मैदानात एक जोरदार राडा झाला. राजस्थानचा अष्टपैलू रियान पराग आणि आरसीबीचा वेगवान गोलंदाज हर्षल पटेल थेट एकमेकांच्या अंगावर धावून गेले. सामन्याच्या पडिल्या डावात २०व्या षटकाच्या अखेरच्या चेंडूवर रियान परागनं षटकार खेचला आणि संघाला १४४ धावांपर्यंतची मजल मारुन दिली. त्यानंतर पॅव्हेलियनकडे परतत असताना हर्षल पटेल आणि रियान पराग यांच्यात वाद झाला. या वादाचे पडसाद सामना संपल्यानंतरही पाहायला मिळाले.
रियान परागने या सामन्यात एकाकी झूंज देताना २९ चेंडूंत अर्धशतक ठोकलं. परागने ३१ चेंडूंत ३ चौकार व ४ षटकारांसह नाबाद ५६ धावा केल्या. त्यानं हर्षल पटेलनं टाकलेल्या २०व्या षटकात १८ धावा चोपल्या. अखेरच्या चेंडूवर खणखणीत षटकार खेचून पेव्हेलियनच्या दिशेने जाणाऱ्या रियानकडे पाहून हर्षल काहीतरी बडबडला. त्यानंतर रियान जाब विचारण्यासाठी माघारी फिरला. दोघांमध्ये वाद वाढणार हे लक्षात येताच राजस्थानच्या सपोर्ट स्टाफमधील सदस्यानं हर्षलला रोखलं.
राजस्थानच्या गोलंदाजांनी अचूक टप्प्यात मारा करत रॉयल चॅलेंजर्स बंगळुरूच्या संघाला अवघ्या ११५ धावांवर गारद करत मोठा विजय प्राप्त केला. सामना संपल्यानंतर प्रतिस्पर्धी संघातील खेळाडूंशी हस्तांदोलन करण्याची पद्धत असते. पण सामन्यात हर्षल पटेल आणि रियान पराग यांच्यात झालेल्या राड्याचे पडसाद इथंही पाहायला मिळाले. हर्षल पटेलनं राजस्थानच्या सर्व खेळाडूंशी हस्तांदोलन केलं. पण यावेळी रियान परागशी हस्तांदोलन करण्यास त्यानं नकार दिला. याचा व्हिडिओ सोशल मीडियावर देखील तुफान व्हायरल झाला आहे.