Zimbabwe Afro T10 - जोहान्सबर्ग बफेलोस ( Johannesburg Buffaloes) संघाकडून खेळणाऱ्या युसूफ पठाणने ( Yusuf pathan) शुक्रवारी झिम्बाब्वे आफ्रो टी१० लीगमध्ये वादळी खेळी केली. संघाला विजयासाठी ४६ चेंडूंत १२६ धावांची आवश्यकता असताना युसूफने डर्बन कलंदर्स ( Durban Qalandars) संघाच्या गोलंदाजांना बेक्कार चोपले. त्यात युसूफच्या तावडीत पाकिस्तानचा गोलंदाज मोहम्मद आमीर सापडला अन् त्याने चौकार-षटकारांची आतषबाजी केली. युसूफने २६ चेंडूंत ४ चौकार व ९ षटकार ठोकताना नाबाद ८२ धावा करून संघाला १ चेंडू व ६ विकेट्स राखून विजय मिळवून दिला.
प्रथम फलंदाजी करताना कलंदर्स संघाकडून आंद्रे फ्लेचरने १४ चेंडूंत ३९ धावा आणि आसीफ अलीने १२ चेंडूंत ३२ धावांची खेळी केली. निक वेल्चनेही ९ चेंडूंत नाबाद २४ धावा चोपताना संघाला ४ बाद १४० धावांपर्यंत पोहोचवले. प्रत्युत्तरात बफेलोस संघाचे आघाडीचे तीन फलंदाज, मोहम्मद हाफिज ( १७), टॉम बँटन ( ४) आणि विल स्मीद ( १६) हे झटपट माघारी परतले. रवी बोपाराही १ धाव करून बाद झाला. बफलोस संघाला ४६ चेंडूंत १२६ धावांची गरज असताना युसूफने चौकार-षटकारांची आतषबाजी केली आणि ९.५ षटकांत ४ बाद १४२ धावा करून संघाचा विजय निश्चित केला.