भारतीय संघाचा माजी कर्णधार महेंद्रसिंह धोनी हा आपल्या शांत स्वभावाने ओळखला जातो. परिस्थितीती कोणतीही असली तरी कूल राहून प्रतिस्पर्धी संघाची बत्ती गूल करण्यात त्याचा हातखंडा आहे. त्यामुळेच क्रिकेट जगतात त्याला कॅप्टन कूलची उपमाही देण्यात आली आहे. पण असा शांत माणूस जर एखाद्या वेळी चिडला तर भल्याभल्यांना अशा वेळी काय करायचं ते सूचत नाही.
होय; धोनीलाही राग येतो!
धोनीसंदर्भातील किस्साही अगदी असाच आहे. पहिली गोष्ट धोनी हा देखील एक माणूस आहे. त्यामुळे त्यालाही राग येणं ही एक स्वाभाविक गोष्ट आहे. फक्त त्याची खासियत ही की, तो अनेकदा आपल्या रागावर अगदी सहज नियंत्रण मिळवतो. पण सध्या त्याचा रागावरील ताबा सुटल्याची गोष्ट चर्चेत आहे. चेन्नई सुपर किंग्सच्या ताफ्यातून खेळताना दिसलेल्या धोनीच्या सहकाऱ्यानेच एका मुलाखतीत धोनीच्या रागाचा पारा चढल्याचा किस्सा शेअर केला आहे.
त्याचा रागाचा पारा चढल्याचे पाहून ड्रेसिंगरुममध्ये पसरली होती शांतता
CSK चा माजी क्रिकेटर सुब्रमण्यम बद्रीनाथ याने धोनीसंदर्भात आश्चर्यचकित करून सोडणारा किस्सा शेअर केला आहे. आयपीएलमध्ये आरसीबी विरुद्धचा सामना गमावल्यानंतर धोनी प्रंचड रागात दिसला होता. त्याच्या रागाचा पारा इतका चढला होता की, ते पाहून ड्रेसिंगरुममध्ये एकच शांतता पसरली होती.
कोणत्या मॅचवेळी नेमकं काय घडलं होतं?
सुब्रमण्यम बद्रीनाथ याने इनसाइड स्पोर्ट्सला दिलेल्या मुलाखतीत CSK च्या ड्रेसिंग रुममध्ये घडलेली धोनीसंदर्भातील अनटोल्ड स्टोरी शेअर केली. तो म्हणाला की, "चेन्नईच्या मैदानात आम्ही आरसीबी विरुद्धच्या सामन्यात धावांचा पाठलाग करत होतो. ठराविक अंतराने आम्ही विकेट गमावल्या. परिणामी सामना आमच्या हातून निसटला. त्यावेळी धोनीचा संयम सुटला होता. शेवटी तोही एक माणूसच आहे. रागाच्या भरात धोनीने पाण्याच्या बाटली लाथ मारत ती पार्कमध्ये पोहचवली होती. त्याचा हा रुद्र अवतार पाहिल्यावर ड्रेसिंग रुममधील सर्वच हैराण झाले होते. त्याच्यासोबत नजरेला नजर मिळवण्याचं धाडसही त्यावेळी कुणाचं झालं नाही, असे ब्रदीनाथ याने म्हटले आहे.
या सामन्यात कुंबळेच्या गोलंदाजीवर मी पायचित झालो होतो, असा उल्लेखही बद्रीनाथ यानं केला. यावरून हा आयपीएलच्या पहिल्या हंगामातील असल्याचे दिसून येते.
Web Title: When Dhoni Losing Cool After IPL Defeat He Kicked Water Bottle Out Of The Park CSK Subramaniam Badrinath Reveals MS Dhoni The Untold Story
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.