WI vs AFG T20 World Cup 2024 : ट्वेंटी-२० विश्वचषक २०२४ मधील ४०व्या सामन्यात वेस्ट इंडिज आणि अफगाणिस्तान हे संघ भिडले. दोन्हीही संघांनी आपला विजयरथ कायम ठेवून सुपर-८ मध्ये जागा मिळवली. त्यामुळे आज कोणता संघ विजयाचा चौकार मारणार आणि कोणाच्या विजयरथाला ब्रेक लागतो हे पाहण्याजोगे आहे. लुसिया येथील डॅरेन सॅमी आंतरराष्ट्रीय स्टेडियमवर ही लढत होत आहे. नाणेफेक जिंकून अफगाणिस्तानने यजमानांना प्रथम फलंदाजीसाठी आमंत्रित केले. विंडिजच्या संघाने आपला रूद्रावतार दाखवत जुन्या आठवणी ताज्या केल्या. निकोलस पूरनने स्फोटक खेळी करून फॉर्ममध्ये असलेल्या अफगाणिस्तानच्या गोलंदाजांची पळता भुई थोडी केली.
निकोलस पूरनच्या ९८ धावांच्या स्फोटक खेळीच्या जोरावर वेस्ट इंडिजने अफगाणिस्तानला तगडे लक्ष्य दिले. विश्वचषकाच्या सुरुवातीपासून चांगली कामगिरी करत असलेल्या अफगाणिस्तानच्या फिरकीपटूंना 'पूरन' वादळ रोखता आले नाही. विजयाचा चौकार मारण्यासाठी अफगाणिस्तानसमोर २१९ धावांचे विशाल आव्हान आहे. वेस्ट इंडिजने निर्धारित २० षटकांत ५ बाद २१८ धावा केल्या.
निकोलस पूरनशिवाय जॉन्सन चार्ल्सने चांगली खेळी केली. त्याने २७ चेंडूत ४३ धावा कुटल्या. पूरनला अवघ्या २ धावांमुळे शतकापासून दूर राहावे लागले. त्याने ८ षटकार आणि ६ चौकारांच्या मदतीने ५३ चेंडूत ९८ धावांची अप्रतिम खेळी केली. पण, अखेरच्या षटकात तो धावबाद झाल्याने त्याला शतकापासून लांब राहावे लागले. अफगाणिस्तानकडून गुलाबदीन नायबने सर्वाधिक (२) बळी घेतले, तर अजमतुल्लाह उमरजई आणि नवीन-उल-हक यांनी प्रत्येकी १-१ बळी घेतला.
अफगाणिस्तानचा संघ -
राशिद खान (कर्णधार), रहमानुल्लाह गुरबाज, इब्राहिम झादरान, गुलाबदीन नैब, अजमतुल्लाह उमरजई, मोहम्मद नबी, नजीबुल्लाह झादरान, करीम जनत, नूर अहमद, नवीन-उल-हक, फजलहक फारूकी.
वेस्ट इंडिजचा संघ -
रोवमन पॉवेल (कर्णधार), ब्रँडन किंग, जॉन्सन चार्ल्स, निकोलस पूरन, शाई होप, शेरफन रूदरफोर्ड, आंद्रे रसेल, अकील हुसैन, अल्झारी जोसेफ, गुडाकेश मोती, ओबेड मॅककॉय.
Web Title: WI vs AFG T20 World Cup 2024 Live West Indies set Afghanistan a target of 219 to win, Nicholas Pooran scores 98
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
