WTC Final India vs Australia : जागतिक कसोटी अजिंक्यपद स्पर्धेच्या फायनलमधील चौथा दिवस शुबमन गिल ( Shubman Gill) ला वादग्रस्त पद्धतीने बाद दिल्याने चर्चेत राहिला. कॅमेरून ग्रीनने टिपलेला चेंडू जमिनीवर टेकल्याचे स्पष्ट दिसत असूनही तिसऱ्या अम्पायरने भारतीय सलामीवीराला बाद दिले आणि त्यानंतर वादाची ठिणगी पडली. त्यानंतर गिलने सोशल मीडियावर कॅमेरून ग्रीनने घेतलेल्या वादग्रस्त झेल घेण्याच्या निर्णयावर आक्षेप नोंदवला. त्याने सोशल मीडियावर ग्रीनने घेतलेल्या झेलचे छायाचित्र पोस्ट केले आणि इमोजीसह आपली निराशा व्यक्त केली.
भारत-ऑस्ट्रेलिया सामना ड्रॉ झाल्यास विजेता कोण बनणार? राखीव दिवसाचा उपयोग होणार का?
भारतीय संघाच्या ४४४ धावांचा पाठलाग करताना गिल १८ धावांवर असताना स्कॉट बोलंडच्या गोलंदाजीवर गल्लीमध्ये उभ्या असलेल्या ग्रीनने त्याच्या डावीकडे झेप घेत झेल टिपला. ग्रीनच्या म्हणण्यानुसार त्याने हा झेल सफाईने घेतला. गिल लगेच पॅव्हेलियनच्या दिशेने गेला नाही. त्यानंतर फील्ड अंपायर टीव्ही अंपायर रिचर्ड केटलब्रो यांच्याकडे सॉफ्ट सिग्नल न देता गेला. सर्व कोनातून काही रिप्ले पाहिल्यानंतर आणि झूम इन केल्यानंतर, केटलब्रोने गिलला बाहेर घोषित केले. या निर्णयाला तीन मिनिटांपेक्षा कमी वेळ लागला. या निर्णयाने गिल आणि त्याचा साथीदार कर्णधार रोहित शर्मा दोघेही हैराण झाले. याशिवाय मैदानात उपस्थित असलेल्या हजारो भारतीय चाहत्यांनीही धिंगाणा घालून आपला राग व्यक्त केला.
गिलच्या ट्विटवर बीसीसीआयनेही नाराजी व्यक्त करताना सावध पवित्रा घेतला आहे. बीसीसीआय उपाध्यक्ष राजीव शुक्ला म्हणाले का, या निर्णयावरून कोणताही वाद आम्हाला निर्माण करायचा नाही. तिसऱ्या अम्पायरने दिलेला निर्णय मान्य करायला हवा.