पाकिस्तानविरुद्धच्या मुल्तान कसोटी सामन्यात इंग्लंडच्या संघाने ऐतिहासिक खेळीसह ७ बाद ८२३ धावांवर आपला पहिला डाव घोषित केला.
पाकिस्तानमध्ये पाहुण्या संघाने केलेली ही सर्वोच्च धावसंख्या आहे. त्यामुळे हा आकडा एक वर्ल्ड रेकॉर्ड सेट करणारा नक्कीच आहे. पण कसोटीच्या इतिहासातील ही सर्वोच्च धावसंख्या नाही.
इंग्लंडच्या संघाने मुल्तानच्या मैदानात पाकिस्तान विरुद्ध उभारलेली धावसंख्या कसोटीच्या आतापर्यंतच्या इतिहासातील चौथ्या क्रमांकाची सर्वोच्च धावंसख्या आहे. यासह इंग्लंडनं कसोटीत सर्वोच्च धावसंख्या उभारणाऱ्या आघाडीच्या ५ संघाच्या यादीत तिसऱ्यांदा आपलं नाव कोरलं आहे.
पण तुम्हाला माहितीये का? कसोटीत सर्वोच्च धावसंख्येचा विक्रम हा श्रीलंकन संघाच्या नावे आहे. २ ऑगस्ट १९९७ मध्ये कोलंबोच्या मैदानात रंगलेल्या भारताविरुद्धच्या कसोटी सामन्यात श्रीलंकेच्या संघाने ६ बाद ९५२ धावांवर डाव घोषित केला होता. हा सामना अनिर्णित राहिला होता. जयसूर्यानं या सामन्यात ३४० धावांची खेळी साकारली होती.
या यादीत दुसऱ्या क्रमांकावर इंग्लंडचा संघ आहे. २० ऑगस्ट १९३८ मध्ये इंग्लंडच्या संघानं ऑस्ट्रेलिया विरुद्धच्या कसोटी सामन्यात ७ बाद ९०३ धावांवर डाव घोषित केला होता. एवढेच नाही इंग्लंडच्या संघाने हा सामना ५७९ धावांनी जिंकला होता.
कसोटीत सर्वोच्च धावंसख्या उभारण्यात तिसऱ्या स्थानावरही इंग्लंडचा संघ आहे. १९३० मध्ये वेस्ट इंडीज विरुद्ध इंग्लंडच्या संघाने ८४९ धावा काढल्या होत्या. हा सामनाही अनिर्णित राहिला होता.
१९५८ मध्ये वेस्ट इंडीजच्या संघाने पाकिस्तान विरुद्धच्या सामन्यात ३ बाद ७९० धावांवर डाव घोषित करत १७४ धावांनी विजय नोंदवला होता. ही कसोटी इतिहासातील पाचव्या क्रमांची सर्वोच्च धावसंख्या आहे.
भारतीय संघ या यादीत आठव्या क्रमांकावर आहे. २०१६ मध्ये चेन्नई कसोटी सामन्यात भारताने इंग्लंड विरुद्ध ७ बाद ७५९ धावांवर डाव घोषित केला होता. केएल राहुलनं १९९ आणि करुण नायरनं या सान्यात ३०३ धावा केल्या होत्या. भारतीय संघाने हा सामना ७५ धावांनी जिंकला होता.