इब्राहिम झाद्रान ते सौरव गांगुली! चॅम्पियन्स ट्रॉफी स्पर्धेत सर्वोच्च धावसंख्या उभारणारे ५ फलंदाज

चॅम्पियन ट्रॉफी स्पर्धेच्या आतापर्यंतच्या इतिहासात सर्वोच्च धावसंख्या उभारणाऱ्या फलंदाजांच्या यादीत भारताचा माजी कर्णधार टॉप ५ मध्ये आहे. इथं पाहा खास रेकॉर्ड

चॅम्पियन्स ट्रॉफी २०२५ च्या हंगामात अफगाणिस्तानचा सलामीवीर इब्राहिम झाद्रान याने ऐतिहासिक खेळी केली.

लाहोरच्या मैदानात रंगलेल्या इंग्लंड विरुद्धच्या सामन्यात त्याने चॅम्पियन्स ट्रॉफी स्पर्धेच्या आतापर्यंतच्या इतिहासातील सर्वोच्च वैयक्तिक धावसंख्या उभारली.

सर्वाधिक वैयक्तिक धावसंख्येसह चॅम्पियन्स ट्रॉफीत 'दादागिरी' करणाऱ्या आघाडीच्या पाच फलंदाजांच्या यादीत सौरव गांगुलीचाही समावेश आहे. एक नजर यासंदर्भातील खास रेकॉर्डवर

अफगाणिस्तानचा सलामीवीर इब्राहिम झाद्रान याने इंग्लंड विरुद्धच्या सामन्यात १४६ चेंडूत १२ चौकार आणि ६ षटकारांच्या मदतीने १७७ धावांची दमदार खेळी केली. चॅम्पियन्स ट्रॉफी स्पर्धेच्या आतापर्यंतच्या इतिहासातील ही सर्वोच्च वैयक्तिक धावसंख्या ठरलीये.

या यादीत दुसऱ्या क्रमांकावर इंग्लंडच्या बेन डकेटचा नंबर लागतो. याच हंगामात त्याने ऑस्ट्रेलिया विरुद्धच्या सामन्यात १४३ चेंडूत १६५ धावा ठोकल्या होत्या. त्याच्या खेळीत १७ चौकार आणि ३ षटकारांचा समावेश होता.

न्यूझीलंडचा नेथन ॲस्टल या यादीत तिसऱ्या क्रमांकावर आहे. २००२ च्या चॅम्पियन्स ट्रॉफी स्पर्धेत युएसए संघाविरुद्ध त्याने १५१ चेंडूत १३ चौकार आणि ६ षटकारांच्या मदतीने नाबाद १४५ धावांची खेळी केली होती.

झिम्बाब्वेचा अँडी फ्लॉवर याने २००२ च्या चॅम्पियन्स ट्रॉफी स्पर्धेत भारतीय संघाविरुद्ध १६४ चेंडूत १३ चौकाराच्या मदतीने १४५ धावांची खेळी केली होती. तो या यादीत चौथ्या क्रमांकावर आहे.

भारताचा माजी कर्णधार आणि क्रिकेटच्या मैदानात दादा या नावाने ओळखला जाणारा सौरव गांगुलीही आघाडीच्या ५ फलंदाजांमध्ये आहे. गांगुलीनं २००० मध्ये रंगलेल्या चॅम्पियन्स ट्रॉफी स्पर्धेत दक्षिण आफ्रिकेविरुद्ध १४२ चेंडूत नाबाद १४१ धावांची खेळी केली होती. या खेळीत त्याने ११ चौकारांसह ६ षटकार मारले होते.