भारतीय संघाचा युवा सलामीवीर शुबमन गिल हा सध्या जगातील सर्वोत्तम युवा खेळाडूंपैकी एक आहे. अवघ्या 2 महिन्यांच्या कालावधीत त्याने वन डे क्रिकेटमध्ये द्विशतक आणि कसोटी तसेच ट्वेंटी-20 फॉर्मेटमध्ये शतक झळकावून आपली ओळख निर्माण केली.
शुबमन गिलच्या शानदार खेळीला आता आयसीसीने देखील सलाम ठोकला आहे. आयसीसी क्रमवारीत त्याने मोठी झेप घेतली असून विराट कोहली आणि रोहित शर्मा यांना मागे टाकले आहे.
मात्र, भारताचा वेगवान गोलंदाज मोहम्मद सिराजला नुकतेच ऑस्ट्रेलियाविरुद्ध केलेल्या सामान्य गोलंदाजीनंतर मोठा फटका बसला आहे. खरं तर सिराजची पहिल्या स्थानावरून घसरण झाली आहे.
2023 च्या सुरुवातीला श्रीलंका आणि न्यूझीलंडविरुद्ध शुबमन गिलच्या बॅटमधून धावांचा पाऊस पडला होता. गिलने मागील 6 वन डे सामन्यात 2 शतके आणि 1 द्विशतक झळकावले आहे. याचा त्याला आयसीसी क्रमवारीत मोठा फायदा झाला आहे.
23 वर्षीय गिल भारताचा एकमेव फलंदाज आहे, जो वन डे क्रमवारीतील टॉप-5 फलंदाजांमध्ये आहे. तो भारताचा कर्णधार रोहित शर्मा आणि विराट कोहली यांच्याही पुढे गेला आहे, जे अनुक्रमे 9व्या आणि 8व्या स्थानावर आहे.
याशिवाय भारताचा वेगवान गोलंदाज मोहम्मद सिराजला वन डे क्रमवारीत मोठा धक्का बसला आहे. न्यूझीलंडविरूद्धच्या मालिकेनंतर वनडेमध्ये नंबर-1 बनलेल्या सिराजची आता तिसऱ्या क्रमांकावर घसरण झाली आहे. तर ऑस्ट्रेलियाचा जोश हेझलवूड पुन्हा एकदा पहिल्या क्रमांकावर आला आहे.
ऑस्ट्रेलियाविरूद्धच्या वन डे मालिकेत सामान्य प्रदर्शन राहिल्यानंतर सिराजची पहिल्या स्थानावरून घसरण झाली. पहिल्या सामन्यात त्याने 3 बळी घेतले होते. पण दुसऱ्या सामन्यात ऑस्ट्रेलियाने 10 गडी राखून भारताला मोठा धक्का दिला.
वनडे क्रिकेटशिवाय कसोटी क्रिकेटबद्दल भाष्य करायचे झाले तर, या यादीत न्यूझीलंडचा माजी कर्णधार केन विल्यमसनचे वर्चस्व पाहायला मिळत आहे. अलीकडेच श्रीलंकेविरुद्धच्या कसोटी मालिकेत त्याने शानदार खेळी केली होती.
1 शतक आणि एक द्विशतक झळकावून विल्यमसनने श्रीलंकेचा पराभव केला. यानंतर केनने 4 स्थानांनी झेप घेत दुसऱ्या क्रमांकावर पोहोचला आहे.
तर ऑस्ट्रेलियाचा मार्नस लाबूशेन या यादीत पहिल्या क्रमांकावर कायम आहे. कसोटी क्रमवारीमध्ये भारताकडून फक्त रिषभ पंतचा टॉप-10 मध्ये समावेश आहे, जो 9व्या स्थानावर आहे.