IPLमध्ये ज्यांच्यावर झाला कोट्यवधींचा वर्षाव, त्यांना ऑस्ट्रेलियानं ट्वेंटी-२० वर्ल्ड कप संघात मिळाले नाही स्थान!

ऑस्ट्रेलियानं आगामी ट्वेंटी-२० वर्ल्ड कप स्पर्धेसाठीच्या संघाची गुरुवारी घोषणा केली. अ‍ॅरोन फिंच, स्टीव्ह स्मिथ, डेव्हिड वॉर्नर, मिचेल स्टार्क आणि पॅट कमिन्स हे अनुभवी खेळाडू ट्वेंटी-२० वर्ल्ड कप स्पर्धेत ऑस्ट्रेलियाला पहिले जेतेपद पटकावून देण्यात प्रयत्नशील असतील. पण, इंडियन प्रीमिअर लीगमध्ये कोट्यवधींची कमाई करणाऱ्या खेळाडूंना ऑस्ट्रेलियाच्या ट्वेंटी-२० वर्ल्ड कप संघात स्थान मिळालेले नाही.

जलदगती गोलंदाज झाय रिचर्डसन याच्यासाठी पंजाब किंग्सनं १४ कोटी रुपये मोजले. त्यानं वेस्ट इंडिज व बांगलादेश दौऱ्यावरून माघार घेतली होती आणि त्यामुळेच त्याला वर्ल्ड कप संघात स्थान पटकावता आले नाही.

आणखी एक जलदगती गोलंदाज राईली मेरेडिथ याच्यासाठी पंजाब किंग्सनं ८ कोटी रुपये मोजले. त्यानं याच वर्षी ऑस्ट्रेलियाकडून पदार्पणही केलं होतं, परंतु वर्ल्ड कपसाठी त्याच्या नावाचा विचार केला गेला नाही.

नॅथन कोल्टर नाइल या मुंबई इंडियन्सच्या खेळाडूलाही वर्ल्ड कप साठीच्या संघात स्थान पटकावता आले नाही. त्याच्यासाठी मुंबई इंडियन्सनं ५ कोटी मोजले होते. २०१९च्या वन डे वर्ल्ड कप स्पर्धेत तो ऑस्ट्रेलियाच्या संघाचा सदस्य होता.

पंजाब किंग्सनं ४.२० कोटींत ताफ्यात दाखल करून घेतलेल्या मोईजेस हेन्रीक्सलाही ऑस्ट्रेलियाच्या ट्वेंटी-२० वर्ल्ड कप संघात स्थान पटकावता आलेले नाही. बांगलादेश व वेस्ट इंडिज दौऱ्यावर तो खेळला, परंतु त्याला चांगली कामगिरी करता आली नाही.

स्फोटक सलामीवीर ख्रिस लिन याच्याकडेही दुलर्क्ष केल गेले आहे. मुंबई इंडियन्सनं त्याला २ कोटींत आपल्या ताफ्यात घेतले, परंतु त्याला फार कमी खेळण्याची संधी मिळाली.

अँड्य्रू टाय हाही ट्वेंटी-२० वर्ल्ड कप खेळणार नाही. त्याला राजस्थान रॉयल्सनं १ कोटींत ताफ्यात घेतले.