IND vs SA, 2nd Test Live Updates : शंभर वर्षात जे फक्त एकालाच जमलं होतं, ते आता शार्दूल ठाकूरनंही करून दाखवलं, केली अनेक दिग्गजांची विक्रम मोडणारी कामगिरी

India vs South Africa, 2nd Test Live Updates : शार्दूल ठाकूरनं ( Shardul Thakur) दक्षिण आफ्रिकेविरुद्धची दुसरी कसोटी गाजवली. भारताच्या पहिल्या डावातील २०२ धावांच्या प्रत्युत्तरात आफ्रिकेचा संघ मोठी धावसंख्या उभारेल असे चिन्ह दिसत होते. पण, शार्दूलनं महत्त्वाच्या विकेट्स घेतल्या.

डीन एल्गनर, किगन पीटरसन, टेम्बा बवुमा या महत्त्वाच्या खेळाडूंसह शार्दूलनं ६१ धावांत ७ विकेट्स घेतल्या आणि आफ्रिकेचा पहिला डाव २२९ धावांवर गुंडाळला. आफ्रिकेनं पहिल्या डावात नाममात्र २७ धावांची आघाडी घेतली. या कामगिरीसह शार्दूलनं मोठमोठे विक्रम मोडले.

दक्षिण आफ्रिकेत एकाच डावात ७ विकेट्स घेणारा शार्दूल हा पहिलाच आशियाई जलदगती गोलंदाज ठरला. यापूर्वी हरभजन सिंगनं १२० धावांत ७ विकेट्स घेतल्या होत्या. वंडरर्सवर २९ वर्षांपूर्वीचा अनिल कुंबळेचा विक्रम शार्दूलनं मोडला. येथे १९९२-९३मध्ये कुंबळेनं ५३ धावांत ६ विकेट्स घेतल्या होत्या.

दक्षिण आफ्रिकेतील ही भारतीय गोलंदाजाची सर्वोत्तम वैयक्तिक कामगिरी ठरली. शार्दूलनं ६१ धावांत ७ विेकेट्स घेतल्या आहेत. त्यानंतर हरभजन सिंग ( 7/120 at Cape Town, 2011), अनिल कुंबळे ( 6/53 at Johannesburg, 1992), जावगल श्रीनाथ ( 6/76 at Port Elizabeth, 2001) आणि रवींद्र जडेजा ( 6/138 at Durban, 2013) यांचा विक्रम मोडला.

दक्षिण आफ्रिकेविरुद्धची कसोटीतील भारतीय गोलंदाजाची ही सर्वोत्तम कामगिरी ठरली. यापूर्वी २०१५मध्ये आर अश्विननं ६६ धावांत ७ विकेट्स घेतल्या होत्या. त्यापाठोपाठ हरभजन सिंग ( 7/87, 2004), आर अश्विन ( 7/145, 2019) असा क्रमांक येतो.

चौथा गोलंदाज म्हणून संघात खेळणाऱ्या गोलंदाजांमधीलही सर्वोत्तम कामगिरी ठरली. १९८१मध्ये कपिल देव यांनी ऑस्ट्रेलियाविरुद्ध २८ धावांत ५ विकेट्स घेतल्या होत्या. त्यानंतर 5/28 - Hardik Pandya v ENG, 2018 व 4/29 - Vijay Hazare v AUS, 1947 यांचा विक्रम येतो.

दक्षिण आफ्रिकेतील मागील १०० वर्षांच्या कसोटी क्रिकेटमधील इतिहासात आतापर्यंत केवळ एकाच पाहुण्या जलदगती गोलंदाजाला ७ विकेट्स घेता आल्या होत्या. १९९९मध्ये इंग्लंडच्या अँड्य्रू कॅडिकनं डर्बन कसोटीत ४६ धावांत ७ विकेट्स घेतल्या होत्या. त्यानंतर शार्दूलनं हा पराक्रम केला.

शार्दूलनं ६८ चेंडूंत पाच विकेट्स घेतल्या. सध्याच्या संघातील जसप्रीत बुमराह व मोहम्मद शमी यांच्यानंतर जोहान्सबर्गवर डावात पाच विकेट्स घेण्याचा पराक्रम शार्दूलनं केला. येथे डावात पाच विकेट्स घेणारा तो सहावा भारतीय गोलंदाज ठरला आहे. अनिल कुंबळे ( १९९२), जावगल श्रीनाथ ( १९९७), एस श्रीसंथ ( २००६) यांनीही हा पराक्रम केला आहे.