Rohit Sharma, IND vs SL, 1st T20I: १६ सामन्यांत १५ विजय; रोहित शर्माने करून दाखवले भारताच्या एकाही कर्णधाराला न जमलेले विक्रम

India vs Sri Lanka, 1st T20I Live Update : इशान किशन ( Ishan Kishan), रोहित शर्मा ( Rohit Sharma) आणि श्रेयस अय्यर ( Shreyas Iyer) यांच्या चौकार-षटकारांच्या आतषबाजीने लखनौ स्टेडियम दणाणून सोडले. या तिघांच्या फटकेबाजीच्या जोरावर भारताने २ बाद १९९ धावांचा डोंगर उभा केला.

त्यानंतर भुवनेश्वर कुमारने ( Bhuvneshwar Kumar) पहिल्या तीन षटकांत दोन धक्के देत श्रीलंकेला बॅकफूटवर फेकले. वेंकटेश अय्यर, युझवेंद्र चहल व पुनरागमन करणारा रवींद्र जडेजा यांनी सुरेख गोलंदाजी करताना भारताचा विजय पक्का केला. श्रीलंकेला ६ बाद १३७ धावा करता आल्या आणि भारताने ६२ धावांनी सामना जिंकला.

इशान किशन आणि रोहित यांनी भारताला पहिल्या विकेटसाठी १११ धावांची सलामी मिळवून दिली. रोहित शर्माला ४४ धावांवर त्रिफळाचीत झाला. इशानने ५६ चेंडूंत १० चौकार व ३ षटकारांसह ८९ धावा कुटल्या. त्यानंतर श्रेयसने २५ चेंडूंत अर्धशतक पूर्ण करताना भारताला २ बाद १९९ धावांचा पल्ला गाठून दिला. श्रेयस २८ चेंडूंत ५ चौकार व २ षटकारांसह ५७ धावांवर नाबाद राहिला.

प्रत्युत्तरात भुवीने पहिल्याच चेंडूवर पथूम निसंकाची विकेट घेतली.त्यानंतर तिसऱ्या षटकात त्याने कामिल मिशारा ( १३) याची विकेट घेतली. भुवनेश्वरने २ षटकांत ९ धावांत २ विकेट्स घेतल्या. वेंकटेशने ३६ धावांत २ बळी टिपले. युझवेंद्र व जडेजा यांनी प्रत्येकी १ विकेट घेतली. असालंका सोडल्यास श्रीलंकेच्या अन्य फलंदाजांकडून संघर्ष दिसला नाही. श्रीलंकेचा चरिथ असालंकाने एकट्याने संघर्ष करताना नाबाद ५३ धावा केल्या.

रोहित शर्माने ४४ धावा करून मोठा विक्रम मोडला. आंतरराष्ट्रीय ट्वेंटी-२०त सर्वाधिक धावा करणाऱ्या फलंदाजाचा मान रोहितने पटकावला. त्याने ३३०४ धावा करताना मार्टिन गुप्तील ( ३२९९) व विराट कोहली ( ३२९६ ) यांना मागे टाकले

भारताचा हा सलग १०वा ट्वेंटी-२० विजय आहे आणि आतापर्यंतची ही सर्वोत्तम कामगिरी आहे. त्यांनी पाकिस्तानचा २०१८ साली सलग ९ सामने जिंकण्याचा विक्रम मोडला. अफगाणिस्ता १२ विजयांसह अव्वल क्रमांकावर आहे.

घरच्या मैदानावर सर्वाधिक ट्वेंटी-२० सामने जिंकणारा रोहित भारताचा यशस्वी कर्णधार ठरला. त्याने १६ पैकी १५ सामने जिंकले आहेत आणि यासह त्याने इंग्लंडचा इयॉन मॉर्गन ( १५ विजय, २५ सामने) व न्यूझीलंडचा केन विलियम्सन ( १५ विजय, ३० सामने) यांच्याशी बरोबरी केली. त्याने ऑस्ट्रेलियाच्या आरोन फिंचचा १४ विजयांचा ( २५ सामने) विक्रम मोडला.

भारताचा हा ट्वेंटी-२० क्रिकेटमधील श्रीलंकेविरुद्धचा १५ वा विजय आहे. पाकिस्तानने न्यूझीलंडविरुद्ध १५ विजय मिळवले आहेत आणि झिम्बाब्वेविरुद्ध १६ विजय मिळवून एकाच संघाविरुद्ध सर्वाधिक विजय मिळवणाऱ्या विक्रमात पाकिस्तान आघाडीवर आहे.