SL vs IND : Team India चा श्रीलंका दौरा; राहुलचे 'हार्दिक' स्वागत, दोन मालिकांसाठी दोन कर्णधार!

भारतीय संघ श्रीलंका दौऱ्यावर २७ जुलै, २८ जुलै व ३० जुलै रोजी ट्वेंटी-२० सामने खेळेल.

रोहित शर्माच्या नेतृत्वातील भारतीय संघाने ट्वेंटी-२० विश्वचषक २०२४ चा किताब उंचावला. विश्वचषक जिंकताच रोहित शर्मा, विराट कोहली आणि रवींद्र जडेजा या त्रिकुटाने ट्वेंटी-२० क्रिकेटला निरोप दिला.

रोहितच्या निवृत्तीमुळे हार्दिक पांड्या टीम इंडियाच्या ट्वेंटी-२० संघाची धुरा सांभाळेल हे जवळपास निश्चित आहे.

येत्या २७ जुलैपासून भारतीय संघ श्रीलंकेविरूद्ध ट्वेंटी-२० आणि वन डे मालिका खेळणार आहे.

नुकताच गौतम गंभीर टीम इंडियाचा मुख्य प्रशिक्षक झाला आहे. त्यामुळे श्रीलंका दौरा ही प्रशिक्षक गंभीरची पहिली परीक्षा असेल.

'टाइम्स ऑफ इंडियाने' बीसीसीआयच्या सूत्रांच्या हवाल्यानुसार दिलेल्या माहितीनुसार, लोकेश राहुल भारताच्या वन डे संघाचा कर्णधार असेल.

भारताचा नियमित कर्णधार रोहित शर्माच्या अनुपस्थितीत लोकेश राहुल श्रीलंकेविरूद्धच्या मालिकेत वन डे संघाची धुरा सांभाळेल असे कळते.

कर्णधार रोहित शर्मा आणि प्रशिक्षक राहुल द्रविड यांच्या नेतृत्वात टीम इंडियाने ट्वेंटी-२० विश्वचषक २०२४ चा किताब जिंकला. या विश्वचषकासह द्रविड यांच्या प्रशिक्षकपदाचा कार्यकाळ संपला. तर रोहित शर्माने ट्वेंटी-२० आंतरराष्ट्रीयमधून निवृत्त होण्याचा निर्णय घेतला.

एकूणच श्रीलंका दौऱ्यावर भारतीय संघ दोन वेगवेगळ्या कर्णधारांच्या नेतृत्वात असेल. खरे तर प्रशिक्षक म्हणून गौतम गंभीरची ही पहिलीच मालिका असेल.

भारतीय संघ श्रीलंका दौऱ्यावर ३ ट्वेंटी-२० व ३ वन डे सामन्यांची मालिका खेळणार आहे. आगामी काळात होणारी चॅम्पियन्स ट्रॉफी पाहता वन डे मालिकेत वरिष्ठ खेळाडूंना संधी दिली जाऊ शकते.

भारतीय संघ श्रीलंका दौऱ्यावर २७ जुलै, २८ जुलै व ३० जुलै रोजी ट्वेंटी-२० सामने खेळेल. त्यानंतर २ ऑगस्टपासून वन डे मालिकेला सुरुवात होईल आणि त्यातील दुसरा व तिसरा वन डे सामना अनुक्रमे ४ व ७ ऑगस्टला खेळवला जाईल.