इंडियन प्रीमिअर लीगला ( आयपीएल) सुरुवात होण्यापूर्वी चेन्नई सुपर किंग्स ( CSK) चे दोन खेळाडूंसह 13 सदस्य कोरोना पॉझिटिव्ह आढळले होते. त्यामुळे स्पर्धेवर संकट येण्याची शक्यता वर्तवण्यात येत होती. पण, क्वारंटाईन कालावधीनंतर CSKच्या खेळाडूंची पुन्हा चाचणी करण्यात आली आणि त्यांचा रिपोर्ट निगेटिव्ह आला.
कोरोनाचा सामना करण्यासाठी बीसीसीआयनं बायो-बबल तयार केले आहेत आणि सर्व संघ त्याचे काटेकोर पालन करत आहेत. पण, या सर्वांत मुंबई इंडियन्सनं एक पाऊल पुढे टाकले आहे.
गतविजेत्या मुंबई इंडियन्सनं कोरोनाशी लढा देण्यासाठी 'स्मार्ट रिंग'चा वापर केला आहे. सध्या दुबईत असलेल्या सर्व आयपीएल फ्रँचायझींमध्ये मुंबई इंडियन्सच्या स्मार्ट रिंगची चर्चा आहे.
मुंबई इंडियन्सच्या खेळाडूंनी सरावाला कसून सुरुवात केली आहे. फ्रँचायझींना बीसीसीआयनं ब्लूतूथ डिव्हाईस दिले आहेत. त्यावर प्रत्येकाला रोजचं फिटनेस अपडेट द्यावं लागतं.
मुंबई इंडियन्सनं एक पाऊल पुढे टाकले आहे. त्यांनी खेळाडूंना स्मार्ट रिंग दिले आहेत.
ही रिंग खेळाडूच्या आरोग्याशी संबंधित सर्व महत्वाच्या घटकांची माहिती घेते. त्याच्या शरिराचं तापमान, नाडीचे ठोके, हार्ट रेट अशा सर्व गोष्टींची माहिती या रिंगमधून मिळणार आहे.
एखाद्या खेळाडूच्या शाररिक हालचालींध्ये काही वेगळेपण जाणवलं किंवा त्याच्यात कोणत्याही प्रकारची लक्षण आढळत असतील तर या रिंगच्या माध्यमातून ते समजू शकतं.
त्यानंतर त्या खेळाडूवर स्वतंत्रपणे उपचार केले जाऊ शकतात. NBA च्या स्पर्धांमध्येही अशाच पद्धतीच्या रिंगचा वापर होतो,असे सूत्रांनी सांगितले.
मुंबई इंडियन्सनं खेळाडूंसाठी 15000 स्क्वेअर फिट मनोरंजन रूम तयार केले आहे.