IPL 2023 ची रिटेंशन यादी मंगळवारी (15 नोव्हेंबर) प्रसिद्ध करण्यात आली. विशेष बाब म्हणजे केन विल्यमसन, ड्वेन ब्राव्हो, जेसन होल्डर यांच्या नावांचा समावेश त्यांच्या संघाने जाहीर केलेल्या खेळाडूंमध्ये होता. रिटेन्शन प्रक्रिया संपल्यानंतर 23 डिसेंबर रोजी कोची येथे होणाऱ्या मिनी लिलावाकडे सर्व संघांचे लक्ष लागले आहे.
आयपीएल 2023 च्या मिनी लिलावाला जवळपास एक महिना बाकी आहे. अशा परिस्थितीत सर्व 10 संघांनी आतापासूनच रणनीती बनवण्यास सुरुवात केली आहे. सनरायझर्स हैदराबादकडे सर्वाधिक ४२.२५ कोटी रुपये आहेत, तर कोलकाता नाइट रायडर्सकडे (केकेआर) फक्त ७.०५ कोटी रुपये शिल्लक आहेत. आयपीएल २०२३ च्या लिलावात ज्या पाच खेळाडूंना मोठी रक्कम मिळू शकते त्याबद्दल जाणून घेऊया.
T20 विश्वचषक विजयात सॅम करनने महत्त्वाची भूमिका बजावली होती. करनने सहा सामन्यांत 11.38 च्या सरासरीने 13 बळी घेतले. सॅम करनने दुखापतीमुळे गेल्या हंगामातील आयपीएल लिलावात नाव समाविष्ट केले नव्हते. यावेळी त्याची मिनी लिलावात सर्वाधिक किंमत मिळण्याची शक्यता व्यक्त केली जात आहे. सॅम करन आयपीएलमध्ये किंग्ज इलेव्हन पंजाब आणि चेन्नई सुपर किंग्जचा भाग होते.
बेन स्टोक्स उत्कृष्ट फॉर्ममध्ये असून त्याने पाकिस्तानविरुद्ध विश्वचषक फायनलमध्ये मॅचविनिंग इनिंग खेळली होती. या अष्टपैलू खेळाडूने आगामी आयपीएल लिलावासाठी आपल्या नावाचा समावेश करण्याचे संकेत दिले आहेत. स्टोक्स यापूर्वीही आयपीएलचा भाग होता. IPL 2017 च्या लिलावात रायझिंग पुणे सुपरजायंट्सने बेन स्टोक्सवर 14.5 कोटी रुपयांची यशस्वी बोली लावली होती. सामना जिंकवून देण्याची क्षमताही त्याच्यात आहे.
ऑस्ट्रेलियन अष्टपैलू कॅमेरून ग्रीनवर IPL 2023 च्या लिलावात मोठी बोली लागण्याची शक्यता आहे. T20 विश्वचषकापूर्वी ऑस्ट्रेलियन संघ भारत दौऱ्यावर आला तेव्हा कॅमेरून ग्रीनने अप्रतिम खेळ दाखवला. कॅमेरून ग्रीन संघाला फलंदाजीसोबतच गोलंदाजीतही उत्तम पर्याय देतो, जो टी-२० क्रिकेटच्या दृष्टीने अत्यंत महत्त्वाचा आहे.
IPL 2023 च्या लिलावात मयंक अग्रवालला मोठी रक्कम मिळण्याची शक्यता आहे. गेल्या सीझनमध्ये मयंकची फलंदाजी चांगली राहिली नाही आणि पंजाब किंग्जला प्लेऑफमध्ये नेण्यात तो अपयशी ठरला. पाहिले तर मयंकची आयपीएलमधील एकूण कामगिरी खराब नाही आणि त्याने दोन हजारांहून अधिक धावा केल्या आहेत. लिलावात त्याला मोठी किंमत मिळाल्यास कोणाला आश्चर्य वाटायला नको.
निकोलस पूरनने IPL 2022 मध्ये सनरायझर्स हैदराबादसाठी एकूण 14 सामने खेळले आणि 38.25 च्या सरासरीने 306 धावा केल्या. म्हणजेच त्याची कामगिरी तितकीशी खराब नव्हती. वेस्ट इंडिजच्या मर्यादित षटकांच्या संघाच्या कर्णधाराकडे मॅचविनिंग इनिंग खेळण्याची क्षमता आहे आणि हे त्याने अनेक प्रसंगी सिद्ध केले आहे. अशा परिस्थितीत पूरनही आयपीएल संघांसाठी पर्याय ठरू शकतो.