MI vs RR Latest News : १९६ धावांच्या लक्ष्याचा पाठलाग करताना राजस्थान रॉयल्सचा ( Rajasthan Royals) संघ बलाढ्य मुंबई इंडियन्ससमोर ( Mumbai Indians) गुडघे टेकेल असाच सर्वांचा अंदाज होता. पण, निराशाजनक सुरुवातीनंतरही बेन स्टोक्स आणि संजू सॅमसन यांनी तुफान फटकेबाजी करून RRला विजय मिळवून दिला.
आतापर्यंत MIचे गोलंदाज हे यंदाच्या Indian Premier League ( IPL 2020) सर्वात तगडे मानले जात होते, परंतु आज त्यांना RRच्या या दोन फलंदाजांनी जमिनीवर आणले. राजस्थान रॉयल्सनं हा सामना ८ विकेट राखून जिंकला. बेन स्टोक्सनं शतकी खेळी केली.
फॉर्मात असलेला क्विंटन डी'कॉक ( ६) पहिल्याच षटकात माघारी परतला. इशान किशन व सूर्यकुमार यादव यांनी मुंबई इंडियन्सचा डाव सावरला. या दोघांची ८३ धावांची भागीदारी कार्तिक त्यागीनं संपुष्टात आणली. इशान किशन ३७ धावांवर माघारी परतला. हार्दिक पांड्या व सौरभ तिवारी यांनी राजस्थान रॉयल्सच्या गोलंदाजांना धु धु धुतले. त्यांनी ३१ चेंडूंत ६४ धावांची भागीदारी केली.
कार्तिक त्यागीनं टाकलेल्या २०व्या षटकात हार्दिकनं २७ धावा कुटल्या. हार्दिक २१ चेंडूंत २ चौकार व ७ षटकारांसह ६० धावांवर नाबाद राहिला. मुंबई इंडियन्सनं ५ बाद १९५ धावा चोपल्या. मुंबई इंडियन्सनं अखेरच्या पाच षटकांत १ विकेटच्या मोबदल्यात ७९ धावा केल्या. यंदाच्या मोसमातील हे तिसरे जलद अर्धशतक आहे.
प्रत्युत्तरात रॉबिन उथप्पा ( १३) दुसऱ्याच षटकात माघारी परतला. कर्णधार स्टीव्हन स्मिथ ( ११)चा जेम्स पॅटिन्सननं त्रिफळा उडवला.
बेन स्टोक्सनं एका बाजूनं फटकेबाजी करताना राजस्थानच्या आशा कायम राखल्या होत्या. स्टोक्सनं २८ चेंडूंत अर्धशतक पूर्ण केले. संजू सॅमसननं त्याला तोलामोलाची साथ दिली. दोघांनी ६३ चेंडूंत शतकी भागीदारी करताना धावा व चेंडू यांतील अंतर कमी केलं.
या दोघांसमोर मुंबई इंडियन्सचे गोलंदाज अपयशी ठरताना दिसत होते. संजू सॅमसननं २७ चेंडूंत अर्धशतक पूर्ण केलं. स्टोक्स-सॅमसननं नाबाद १५२ धावांची भागीदारी करून राजस्थानला १८.२ षटकांत २ बाद १९६ धावा करून विजय मिळवून दिला.
स्टोक्सन ६० चेंडूंत १४ चौकार व ३ षटकारांसह १०७ धावांवर, तर सॅमसन ३१ चेंडूंत ४ चौकार व ३ षटकारांसह ५४ धावांवर नाबाद राहिला.
आयपीएलच्या इतिहासात धावांचा पाठलाग करताना १७ खेळाडूंनी शतकी खेळी केली, परंतु एकापेक्षा अधिक शतक कोणाला झळकावता आले नाही.
धावांचा पाठलाग करताना दोन शतक झळकावणारा बेन स्टोक्स हा आयपीएल इतिहासातील पहिलाच फलंदाज ठरला. त्यानं २०१७ मध्ये रायझिंग पुणे सुपरजायंट्स संघाचे प्रतिनिधित्व करताना गुजरात लायन्सविरुद्ध नाबाद १०३ धावा ( ६३ चेंडू, ७ चौकार व ६ षटकार) केल्या होत्या.