२ जिवलग मैत्रिणी बनल्या सख्ख्या वैरी; दारूच्या नशेत होत्याचे नव्हते झाले मग...

राणी आणि सपना भाड्याच्या घरात राहत होत्या. राणी गुडगाव येथे ब्यूटी पार्लरमध्ये काम करायची तर सपना पार्टीत वेटर अथवा डेकोरेटरचे काम करायची

नवी दिल्ली - राजधानीच्या सिव्हिल मजनू टीला परिसरात एका महिलेने दुसऱ्या महिलेची चाकू भोसकून हत्या केली आहे. किरकोळ कारणावरून ही हत्या झाल्याचे पोलिसांच्या तपासात समोर आले. मृत महिलेची ओळख ३५ वर्षीय राणी म्हणून झाली आहे. मृत महिला आणि आरोपी या दोघींनी खूप दारू प्यायली होती. त्यावेळी दोघींमध्ये भांडण झाले आणि याच भांडणाचे रुपांतर हत्येत झाले असं सुरुवातीच्या पोलीस तपासात उघड झाले. 

मंगळवारी सकाळी रक्ताच्या थारोळ्यात एका महिलेचा मृतदेह पाहिल्यानंतर स्थानिकांनी पोलिसांना कळवले. पोलिसांनी घटनास्थळी धाव घेत मृतदेह ताब्यात घेऊन पोस्टमोर्टमला पाठवला. या प्रकरणी पोलिसांनी गुन्हा नोंदवून तपासाला सुरुवात केली आहे. पोलिसांच्या तपासानुसार, हत्येतील आरोपी महिला ३६ वर्षीय सपनाला अटक करण्यात आली आहे. सपनाच्या वडिलांचे अलीकडेच निधन झाले होते. त्यांच्याबद्दल राणीने काही विधान केले. त्यावरून संतापलेल्या सपनाने राणीला जीवे मारले. 

राणी आणि सपना भाड्याच्या घरात राहत होत्या. राणी गुडगाव येथे ब्यूटी पार्लरमध्ये काम करायची तर सपना पार्टीत वेटर अथवा डेकोरेटरचे काम करायची. सपना ही घटस्फोटीत महिला असून तिला छोटी मुलगी आहे. पोलिसांच्या माहितीनुसार, मंगळवारी सकाळी साडेसात वाजता पीसीआरला कॉल आला. मजनू टिला परिसरात एका घराच्या तिसऱ्या मजल्यावर महिलेचा मृतदेह पडल्याची माहिती दिली. त्यानंतर पोलीस घटनास्थळी पोहचले तिथे सपना भेटली तिने रक्ताच्या थारोळ्यात पडलेल्या महिलेची ओळख राणी म्हणून सांगितली. तपासानंतर पोलिसांनी हत्येचा गुन्हा दाखल केला. 

तपासात आरोपी सपनाने पोलिसांसमोर हत्येची कबुली दिली. २९ मे रोजी रात्री सपना, राणी, नेहा आणि तेनजिंग आणि अन्य मित्र रात्री उशीरा पार्टीसाठी नेहाच्या घरी गेले होते. तिथे सपना आणि राणी यांच्यात काही कारणावरून वाद झाला. त्यानंतर राणी आणि सपना दोघी राहत असलेल्या भाड्याच्या घरी पोहचल्या. याठिकाणी दोघींना पुन्हा दारू प्यायली, पहाटे ४ वाजेपर्यंत हा कार्यक्रम सुरू होता. दोघींमध्ये पुन्हा वाद सुरू झाला. तेव्हा राणीने सपनाच्या मृत वडिलांबाबत कमेंट केली. त्यातून सपनाला राग आला. तिने चाकू भोसकून राणीचा खून केला. घटनास्थळी पोलिसांना चाकूही सापडला आहे.