माझ्या मुलीशी लग्न लावेन, नर्सच्या पतीचा आरोपीशी सौदा; डॉक्टरची गोळ्या झाडून हत्या

या आरोपींनी हत्येच्या एक दिवस आधी हॉस्पिटलमध्ये रेकी केली होती असं नर्सिंग होममधील कर्मचारी आबिद यांनी सांगितले.

नवी दिल्ली - शहरातील कालिंदी कुंज परिसरात एका नर्सिंग होममध्ये डॉक्टरची गोळी मारून हत्या करण्यात आली आहे. या प्रकरणी पोलिसांनी अल्पवयीन आरोपीला अटक केली. मुख्य आरोपी त्याच्या साथीदारासह रुग्ण बनून हॉस्पिटलमध्ये घुसला होता. विशेष म्हणजे या डॉक्टरला मारण्यासाठी महिला कर्मचाऱ्याच्या पतीने अल्पवयीन आरोपीशी हातमिळवणी करून हत्येचा कट रचल्याची धक्कादायक माहिती उघड झाली आहे.

माहितीनुसार, डॉक्टरची हत्या करण्यासाठी अल्पवयीन आरोपीला आमिष दाखवण्यात आले होते. महिला कर्मचाऱ्याच्या पतीने जर ही हत्या केली तर तुझं माझ्या मुलीशी लग्न लावून देऊ असं आश्वासन दिले. गोळी मारणाऱ्या आरोपीचे हॉस्पिटलमधील महिला स्टाफच्या मुलीसोबत प्रेम प्रकरण सुरू होते. या घटनेनंतर हॉस्पिटलमध्ये दहशतीचं वातावरण पसरलं आहे. पोलिसांनी महिला कर्मचारी आणि तिच्या पतीचीही चौकशी केली. पकडलेला आरोपी अन्य एका साथीदारासह हॉस्पिटलमध्ये प्राथमिक उपचार करण्याच्या बहाण्याने घुसला होता. दोन आरोपींपैकी एकाने गोळी चालवण्यापूर्वी कम्पाऊंडरकडून त्याच्या पायाला पट्टी बांधून घेतली होती. त्यानंतर औषध घेण्याचं सांगून दोघे डॉक्टरच्या कॅबिनमध्ये शिरले आणि तिथे डॉ. जावेद अख्तरची गोळी मारून हत्या केली.

मृत डॉक्टर गेल्या २ वर्षापासून नर्सिंग होममध्ये कार्यरत होते, घटनेच्या दिवशी त्यांची ड्युटी रात्री ८ वाजता सुरू झाली होती. त्यावेळी कामावर असलेल्या नर्सिंग स्टाफ गजाला परवीन आणि मोहम्मद कामिल यांनी गोळीबारीचा आवाज ऐकला. त्यानंतर परवीन कॅबिनमध्ये गेली तेव्हा डॉक्टर रक्ताच्या थारोळ्यात खाली पडले होते. या आरोपींनी हत्येच्या एक दिवस आधी हॉस्पिटलमध्ये रेकी केली होती असं नर्सिंग होममधील कर्मचारी आबिद यांनी सांगितले. या घटनेतील मुख्य आरोपीचं वय १६ वर्ष आहे. हत्येनंतर या आरोपीने सोशल मिडिया प्लॅटफॉर्मवर त्याच्या फोटोसह एक कॅप्शन अपलोड करत करून टाकला २०२४ मध्ये मर्डर असा उल्लेख केला आहे.

दरम्यान, डॉक्टरच्या हत्येतील आरोपी एकाच परिसरात राहणारे असून त्यांनी कट रचून ही हत्या केली. त्यातील एकाला हापूड येथून अटक केली. दुसऱ्या आरोपीला पकडण्यासाठी पोलीस पथक प्रयत्नशील आहे. दोन्ही अल्पवयीन आरोपींनी कम्पाऊंडरकडून ड्रेसिंग करून घेतली होती. त्यानंतर डॉक्टरांच्या कॅबिनमध्ये प्रवेश करून त्यांची गोळी मारून हत्या केली असं सहपोलीस आयुक्त एसके जैन यांनी सांगितले. त्याशिवाय पकडलेल्या आरोपीने डॉक्टरांच्या पायावर गोळी झाडली होती. त्याचे हे कृत्य सीसीटीव्ही कॅमेऱ्यात कैद झाले असं पोलिसांनी सांगितले.