माता न तू वैरिणी! 3 महिन्यांच्या लेकीला आईनं तिसऱ्या मजल्यावरुन फेकलं; कारण काय तर...

एका निर्दयी आईनं आपल्याच पोटच्या पोरीला हॉस्पिटलच्या तिसऱ्या मजल्यावरुन फेकल्याची धक्कादायक घटना समोर आली आहे.

आई आपल्या मुलांना स्वतःच्या जीवापेक्षा जास्त जपते. पण गुजरातमधून एक अशी बातमी समोर आली आहे, ज्यावर विश्वास ठेवणंही कठीण झालंय. एका आईनं आपल्या तीन महिन्यांच्या चिमुरडीला हॉस्पिटलच्या तिसऱ्या मजल्यावरुन खाली फेकल्याची घटना घडलीये. या घटनेत त्या चिमुरडीचा जागीच मृत्यू झाला आहे. या घटनेनंतर पोलिसांनी 23 वर्षीय आईला अटक केली आहे. ही घटना नववर्षाच्या पहिल्या दिवशी म्हणजेच 1 जानेवारीला घडली आहे. 

पोलिसांनी सांगितल्यानुसार, गुजरातमधील सिव्हिल हॉस्पिटलमध्ये ही घटना घडली आहे. मुलीला तिसऱ्या मजल्यावरून खाली फेकणारी महिला ही आणंदमधील पेटलाड येथील रहिवासी आहे. फरझानबानू मलेक असे या महिलेचे नाव आहे. महिलेने पोलिसांना सांगितले की, तिची तीन महिन्यांची मुलगी अमरीनबानू जन्मापासूनच आजारी होती. तिला खूप त्रास व्हायचा, तिचा त्रास कमी करण्यासाठी हे पाऊल उचलले. आईच्या या निर्दयतेची कहाणी ऐकून सगळ्यांनाच धक्का बसला आहे.

एका पोलीस अधिकाऱ्याने सांगितले की, तीन महिन्यांच्या मुलीला दोन आठवड्यांपूर्वी रुग्णालयात दाखल करण्यात आले होते. मुलीच्या हत्येनंतर आईने मूल रुग्णालयातून बेपत्ता झाल्याचा दावा केला. पण, रुग्णालयातील सीसीटीव्ही फुटेजमध्ये ती आपल्या मुलीसोबत गॅलरीत फिरताना आणि नंतर रिकाम्या हातानं परत येताना दिसली. यानंतर चौकशीत आईने गुन्ह्याची कबुली दिली.