३० लाखाची खंडणी, महिला टीचरसोबत अफेअर?; १० वी तील युवकाच्या हत्येचं गुपित उघड

प्रभातच्या या प्लॅनिंगमध्ये रचिता आणि त्याचा मित्र आर्यनही सहभागी होता. कुशाग्रची गळा दाबून हत्या केल्यानंतर प्रभातने पोलिसांची दिशाभूल करण्यासाठी षडयंत्र रचलं

कानपूर – उत्तर प्रदेशातील कानपूर इथं एका व्यापाऱ्याच्या मुलाची हत्या झाल्याने खळबळ माजली आहे. मृत मुलगा हा १० वीच्या वर्गात शिकायला होता, त्याचे नाव कुशाग्र होते. सोमवारी कुशाग्र त्याच्या स्कूटीवरून ट्यूशनला जाण्यासाठी घरातून निघाला. परंतु रात्री उशीर झाला तरी तो घरी परतला नाही त्यामुळे घरच्यांची चिंता वाढली. त्यावेळी अचानक काही अज्ञातांनी व्यापाऱ्याच्या घरी ३० लाख रुपयांची खंडणी देण्याची चिठ्ठी फेकली आणि फरार झाले.

घाबरलेल्या कुटुंबाने थेट पोलीस ठाणे गाठले आणि मुलाच्या बेपत्ता होण्याची तक्रार नोंदवली. अपहरणाची शक्यता लक्षात घेता पोलिसांनी तात्काळ पाऊले उचलली. स्वत: घटनास्थळी पाहणीसाठी सहपोलीस आयुक्त पोहचले. मात्र सकाळी कुशाग्रचा मृतदेह सापडला. त्यात धक्कादायक खुलासा झाला. पोलीस सूत्रांनुसार, व्यापाऱ्याचा १६ वर्षीय मुलगा कुशाग्रचा मृतदेह त्याची ट्यूशन टिचर रचिताच्या घरी स्टोअर रुममध्ये आढळला. कुशाग्रची हत्या करणारा अन्य कुणी नसून रचिताचा बॉयफ्रेंड प्रभात होता. प्रभातला कुशाग्रचं रचितासोबत अफेअर सुरू असल्याची शंका होती. त्यातूनच त्याने कुशाग्रची हत्या करण्याचे प्लॅनिंग आखले.

प्रभातच्या या प्लॅनिंगमध्ये रचिता आणि त्याचा मित्र आर्यनही सहभागी होता. कुशाग्रची गळा दाबून हत्या केल्यानंतर प्रभातने पोलिसांची दिशाभूल करण्यासाठी षडयंत्र रचलं. खंडणीसाठी कुशाग्रची हत्या झाल्याचा बनाव रचला. अपहरण, खंडणी त्यातून पोलिसांचा तपास भरकटेल असं प्रभातने रणनीती आखली. रचिताच्या घरी कुशाग्रची हत्या करून प्रभातने आधी त्याची स्कूटर घेतली, त्यानंतर आर्यनला सोबत घेत त्याची नंबरप्लॅट बदलली. त्यानंतर ३० लाखांची खंडणी मागणारी चिठ्ठी कुशाग्रच्या घरी फेकली आणि फरार झाले. चिठ्ठीत काही धार्मिक घोषणाही दिल्या होत्या जेणेकरून पोलिसांचा गोंधळ होईल.

घटनेनंतर पोलिसांनी सीसीटीव्ही फुटेज तपासले, काही लोकांची चौकशी केली. त्यात कुशाग्रची टीचर रचिताचे नाव आले. रचिता आधी कुशाग्रच्या घरी येऊन त्याला शिकवत होती. मात्र घरच्यांनी तिला काढून टाकले होते. रचिताची चौकशी केल्यावर प्रभातचे नाव समोर आले. त्यानंतर दोघांना समोरासमोर बसवून खाकीचा धाक दाखवला. सुरुवातीला दोघांनी उडवाउडवीची उत्तरे दिली. परंतु सीसीटीव्हीत घटनास्थळी आसपास प्रभातची हजेरी आणि खंडणीच्या चिठ्ठीतील हँडरायटिंग यावर संशय बळावला. पोलिसांनी जाब विचारताच दोघांनी सत्य उघड केले.

कुशाग्रचा मृत्यू संध्याकाळी साडे पाच वाजता झाला होता. खंडणीची मागणी केवळ पोलिसांची दिशाभूल करण्यासाठी होती. सीसीटीव्ही पाहिले असता कुशाग्र स्वत:च्या मर्जीने रचिताच्या घरी गेला होता. त्यानंतर रचिताचा बॉयफ्रेंड प्रभात घरात जातो. त्याचे घर रचिताच्या घराजवळच आहे. दोघे काही वेळाने बाहेर येतात परंतु कुशाग्र दिसत नाही. त्याच काळात घरी हत्या झाल्याचा संशय पोलिसांना आहे. सध्या पोलीस या घटनेचा शोध घेत आहेत.