स्लॅब पडून ५ जणांचा झाला होता मृत्यू; दुर्घटनाग्रस्त मोहिनी इमारतीच्या बिल्डरवर गुन्हा दाखल

Crime News : शहरात धोकादायक इमारतीची संख्या लक्षणीय असल्याने, पुनर्बांधणीचा प्रश्नही ऐरणीवर आला आहे.

ठळक मुद्देसहायक आयुक्त गणेश शिंपी यांनी तक्रार दाखल केली असून दुसऱ्या दुर्घटनाग्रस्त साईशक्ती इमारतीच्या बिल्डरवर गुन्हा कधी? असा प्रश्न विचारला जात आहे. 

सदानंद नाईक 

उल्हासनगर : गेल्या महिन्यात मोहिनी पॅलेस इमारतीचा स्लॅब पडून ५ जणांच्या मृत्यू प्रकरणी बिल्डरावर उल्हासनगर पोलीस ठाण्यात गुन्हा दाखल झाला. सहायक आयुक्त गणेश शिंपी यांनी तक्रार दाखल केली असून दुसऱ्या दुर्घटनाग्रस्त साईशक्ती इमारतीच्या बिल्डरवर गुन्हा कधी? असा प्रश्न विचारला जात आहे. 

उल्हासनगरात सन १९९२ ते ९८ दरम्यान उलावा रेती व दगड्याच्या बारीक चुऱ्यातून बहुतांश इमारती बांधण्यात आल्या असून अश्या इमारतीचे स्लॅब पडून अनेक जणांचा बळी गेले आहे. गेल्या महिन्यात मोहिनी पॅलेस व साईशक्ती इमारतीचे स्लॅब कोसळून १२ जणांचा बळी गेल्याने, शहरात भितीचे वातावरण निर्माण झाले. महापालिकाने सन १९९४ ते ९८ दरम्यानच्या इमारतीचे सर्वेक्षण करून ५०५ इमारतीला स्ट्रॅक्टरल ऑडिट करण्याच्या नोटिसा दिल्या. त्यापूर्वी १० वर्ष जुन्या इमारतींना नोटिसा देणे महापालिकेने सुरू केले. दुर्घटनाग्रस्त झालेल्या मोहिनी व साईशक्ती इमारतीच्या बिल्डरवर गुन्हा दाखल करण्याची मागणी सर्वस्तरातून होऊ लागल्यावर, सहायक आयुक्त गणेश शिंपी यांनी आयुक्तांच्या आदेशानुसार इमारतीचे बिल्डर मनोज लाहोरी यांच्या विरोधात अवैध व विना परवाना इमारत बांधून दुर्घटनेस व नागरिकांच्या मृत्यूस कारणीभूत ठरल्याची तक्रार उल्हासनगर पोलीस ठाण्यात केल्यावर, पोलिसांनी गुन्हा दाखल केला.

 दुर्घटनाग्रस्त मोहिनी पॅलेस इमारतीच्या बिल्डरवर गुन्हा दाखल झाल्यावर, साईशक्ती इमारतीच्या बिल्डरवर गुन्हा दाखल करण्याची मागणी होत आहे. यापूर्वी इमारतीचे स्लॅब पडून मृत्युमुखी पडलेल्या इमारत बिल्डरवर गुन्हा दाखल करण्याची मागणी होत आहे. तसेच दुर्घटनाग्रस्त व धोकादायक इमारतीच्या पुनर्बांधणीची मागणी होत आहे. शहरात धोकादायक इमारतीची संख्या लक्षणीय असल्याने, पुनर्बांधणीचा प्रश्नही ऐरणीवर आला आहे.