मित्रानेच केली मित्राची वीट डोक्यात मारून हत्या; पोलिसांनी आरोपीला केली अटक

वसईच्या सर डी एम पेटीट मनपा रुग्णालयात विमलेशला आणल्यावर तेथील डॉक्टरांनी तपासून मृत घोषित केले.

मंगेश कराळे

नालासोपारा - नायगांवच्या वाकीपाडा परिसरात राहणाऱ्या २८ वर्षीय मित्राची २४ वर्षीय आरोपी मित्राने डोक्यात वीट मारून हत्या केल्याची घटना उघडकीस आली आहे. आरोपी मित्राने मित्राच्या अंगावर भिंत पडल्याने जखमी झाल्याचा बनाव केला होता. पण डॉक्टर व वालीव पोलिसांनी हा बनावाचा डाव उधळून लावून हत्या करणाऱ्या आरोपी मित्राला मंगळवारी गुन्हा दाखल करून अटक करत गुन्ह्याचा छडा लावला आहे. 

वाकीपाडा येथील दत्त मंदिरासमोर राहणारा विमलेशकुमार पाठक (२८) याला त्याच परिसरात राहणाऱ्या आरोपी मित्र विक्रम प्रजापती (२४) याने सोमवारी रात्री नऊ वाजण्याच्या सुमारास चाळीतील शेवटच्या मोकळ्या रूममध्ये पार्टी करण्यासाठी घेऊन गेला. दारू पिऊन दोघांमध्ये कोणत्यातरी कारणावरून वाद झाल्याने आरोपीने विमलेशच्या डोक्यात, तोंडावर वीटेनी व ठोशाबुक्यांनी मारहाण केली. आरोपीने विमलेशची पत्नी हेमा पाठक (२२) हीला रूममधील भिंत अंगावर पडल्याने दुखापत झाल्याचे सांगून जूचंद्र येथील सरकारी रुग्णालयात उपचारासाठी घेऊन गेले. पण विमलेशची स्थिती नाजूक असल्याने त्याला उपचारासाठी तेथील डॉक्टरांनी दुसरीकडे नेण्यास सांगितले. 

वसईच्या सर डी एम पेटीट मनपा रुग्णालयात विमलेशला आणल्यावर तेथील डॉक्टरांनी तपासून मृत घोषित केले. पण विमलेशच्या डोक्यावरील आणि चेहऱ्यावरील जखमा पाहून भिंत अंगावर पडल्यामुळे झाल्या नसल्याचा अभिप्राय डॉक्टरांनी दिला. त्यानंतर आरोपी रुग्णालयातून पळून गेला. वालीव पोलिसांनी एमएलसीवरून अकस्मात मृत्यूची नोंद करून गुन्ह्याच्या तपासाला सुरुवात केली. सदर हत्या ही पैश्याच्या वादातून झाल्याचे पोलिसांना संशय आहे. वालीव पोलिसांनी आरोपीला सदर परिसरातून अटक करून चौकशी केल्यावर त्याने गुन्ह्याची कबुली दिली आहे. विमलेशच्या पत्नीने वालीव पोलीस ठाण्यात मंगळवारी तक्रार देऊन हत्येचा गुन्हा दाखल केला आहे.