महाविद्यालयात घुसून टोळक्याची विद्यार्थ्यास मारहाण

आसावा ब्रदर्स कॉलेजमधील प्रकार : पुंडलिकनगर ठाण्यात अदखलपात्र गुन्हा दाखल

औरंगाबाद : दुसऱ्या महाविद्यालयातील एका टोळक्याने किरकोळ वादातून बारावीच्या विद्यार्थ्याला बेदम मारहाण केली. यात १७ वर्षीय विद्यार्थी जखमी झाला. ही घटना एन-४, सिडको येथील आसावा ब्रदर्स कनिष्ठ महाविद्यालयात गुरुवारी दुपारी १२ वाजता घडली. या प्रकरणी पुंडलिकनगर ठाण्यात अदखलपात्र गुन्हा नोंदविण्यात आला.

तनिष्क संतोष जैस्वाल असे जखमी विद्यार्थ्यांचे नाव आहे. त्याने दिलेल्या तक्रारीवरुनुसार तो आसावा ब्रदर्स कनिष्ठ महाविद्यालयात बारावीत शिकतो. २४ नोव्हेंबरला दुपारी १२ वाजता महाविद्यालय सुटले. तो गेटवर असतानाच संजयनगर, म्हाडा कॉलनी येथील चौघांचे टोळके तेथे आले. ते असावा ब्रदर्स कॉलेजचे विद्यार्थी नाहीत. तरीही ते आत घुसले. त्यांनी जुन्या वादातून तनिष्कला शिवीगाळ करीत लाथाबुक्क्यांनी मारून त्याला जखमी केले. तसेच, नंतर बघून घेऊ, अशी धमकी दिली.

या प्रकारामुळे काॅलेज परिसरात एकच गोंधळ उडाला. एकच धावपळ झाली. विद्यार्थिनींमध्ये भिती पसरली. हा प्रकार पुंडलिकनगर पोलिसांना समजताच सहायक निरीक्षक शेषराव खटाणे यांनी पथकासह घटनास्थळी धाव घेतली. जखमीला ठाण्यात नेऊन त्याला वैद्यकीय तपासणीसाठी पाठविले. त्याच्या तक्रारीनंतर चौघांविरुद्ध अदखलपात्र गुन्हा नोंदवीला. मारहाण करणारे चौघेही अल्पवयीन असल्यामुळे त्यांच्या पालकांना बोलावून घेत पुडलिंकनगर पोलिसांनी समज देऊन सोडून दिले.