कामाचे आमिष दाखवून अल्पवयीन मुलीला ८० हजारात परराज्यात विकले; संशयिताला अटक

याप्रकरणी उपनगर पोलीस ठाण्यात गुन्हा दाखल केला  आहे. 

अल्पवयीन मुलीस केटरिंगच्या कामाचे आमिष दाखवत तिचे परराज्यात बळजबरीने लग्न लावून देत तिला 80 हजारात विकल्याचा धक्कादायक प्रकार नाशिकमधे उघडकीस आला आहे. याप्रकरणी उपनगर पोलीस ठाण्यात गुन्हा दाखल केला  आहे. 

केटरिंगच्या कामाचे आमिष दाखवत नाशिकच्या एका अल्पवयीन मुलीला फूस लावून एका महिलेने तिला आळंदी या ठिकाणी नेत 80 हजारात तिचा सौदा करत हैदराबाद येथील तरुणांशी बळजबरीने विवाह लावून दिला. आणि त्यानंतर त्या मुलीस हैदराबाद या ठिकाणी नेऊन डांबून ठेवले. मुलीने मात्र हुशारी दाखवत तुम्ही माझा घरी चला माझ्या घरच्यांना सांगा असे सांगत त्यांना घेऊन पुणे या ठिकाणी आली. त्या ठिकाणी आरडा- ओरड केली असता स्थानिक नागरिकांनी तिची विचारणा केली. त्यावेळेस मुलीने परिस्थिती सांगितल्यानंतर पुण्याच्या नागरिकांनी मुलीच्या भावांशी संवाद साधत घडलेला प्रकार सांगितला. 

यानंतर त्यांनी तातडीने मुलीला नाशिकच्या जिल्हा रुग्णालयात आणले असता या ठिकाणी संबंधित महिला आणि तरुण आले असता त्यांना नागरिकांच्या रोशाला सामोरे जावे लागले.  याप्रकरणी पोलिसांनी गुन्हा दाखल करत संबंधित महिला व एकाला अटक केली असून पुढील तपास सुरू आहे. घडलेला प्रकार मुलीने सांगितला असून या त्यांना शिक्षा व्हावी अशी मागणी केली आहे.

परराज्यात मुलीला नेत तिची विक्री करणे आणि लग्न लावून देणारे असे आणखी काही या मंडळींनी केले आहे का, याचा सखोल तपास पोलीस करत आहेत. यातून मुलींना विक्री करण्याची मोठे रॅकेट उघडकीस येण्याची शक्यता आहे. या मुली बाबतचे घडले ते तर कोणासोबत घडू नये यामुळे आरोपींना कठोर शिक्षा व्हावी, अशी मागणी नागरिकांकडून करण्यात आली. याप्रकरणी उपनगर पोलिसांनी एका महिला एजंट सह एकाला ताब्यात घेतले असून पुढील तपास उपनगर पोलीस करत आहेत. या माध्यमातून आणखी काही गोष्टी समोर येण्याची शक्यता देखील पोलिसांनी वर्तविले आहे.