ब्यूटी पार्लरमध्ये तयार होण्यासाठी गेली नवरी; पोलीस कॉन्स्टेबलने गोळी झाडली

आरोपी घटनास्थळावरुन फरार होताना ब्यूटी पार्लरमध्ये काम करणाऱ्या कर्मचाऱ्याने त्याला पकडले. परंतु आरोपीने त्याच्या तावडीतून निसटून पळ काढला

मुंगेर - बिहारच्या मुंगेर इथं ह्दयद्रावक घटना समोर आली आहे. याठिकाणी लग्नाला तयार होण्यासाठी ब्यूटी पार्लरला गेलेल्या नवरीला पोलीस युवकाने गोळी मारली आहे. त्यानंतर या पोलिसाने स्वत:वर गोळी झाडून आत्महत्या करण्याचा प्रयत्न केला. गोळी लागलेल्या नवरीला जखमी अवस्थेत नजीकच्या रुग्णालयात उपचारासाठी दाखल करण्यात आले. 

मिळालेल्या माहितीनुसार, या मुलीचं रविवारी लग्न होणार होते. त्यामुळे ती तयार होण्यासाठी ब्यूटी पार्लरला गेली होती. सध्या पोलीस या प्रकरणाचा तपास करत आहे. युवतीला गोळी मारणारा पोलीस कॉन्स्टेबल हा युवतीचा प्रियकर असल्याचे तपासात समोर आले. प्रेयसीच्या लग्नामुळे प्रियकर पोलीस युवक खूप वैतागला होता. त्यातून संतापलेल्या युवकाने हे कृत्य केले आहे. कस्तुरबा चौकात ब्यूटी पार्लर होते त्याठिकाणी ही घटना घडली. 

पोलिसांनी सांगितले की, २६ वर्षीय युवतीला तिच्या प्रियकर पोलीस कॉन्स्टेबलने गोळी मारली. गोळी युवतीच्या डाव्या खांद्यावर लागली. ज्यात ती गंभीर जखमी झाली. त्यानंतर कॉन्स्टेबल युवकाने स्वत:वर पिस्तुल ताणली आणि ३ गोळ्या झाडल्या. परंतु घाबरलेल्या अवस्थेत त्याच्या हातातून पिस्तुल खाली पडली. आरोपी घटनास्थळावरुन फरार होताना ब्यूटी पार्लरमध्ये काम करणाऱ्या कर्मचाऱ्याने त्याला पकडले. परंतु आरोपीने त्याच्या तावडीतून निसटून पळ काढला. त्याठिकाणी अन्य कर्मचाऱ्यांनी जखमी युवतीला तात्काळ हॉस्पिटलला दाखल केले. पोलिसांना या घटनेची माहिती मिळताच तपास पथक घटनास्थळी पोहचले आणि त्यांनी पंचनामा केला. 

आरोपी अमन हा बिहार पोलीसमधील कर्मचारी आहे. त्याची पटना येथे पोस्टिंग झाली होती. तो मूळचा महेशपूर इथला रहिवासी होता. सध्या आरोपी युवक फरार असून त्याचा शोध घेतला जात आहे असं डीएसपी राजेश कुमार यांनी म्हटलं. तर रविवारी संध्याकाळी युवती तिच्या लग्नाची तयारी करण्यासाठी ब्यूटी पार्लरला आली होती. अचानक रात्री साडे आठ वाजता कॉन्स्टेबल अमन तिथे पोहचला. त्याने युवतीवर फायरिंग केली. त्यावेळी कुणाला काहीच कळले नाही. त्यानंतर कॉन्स्टेबलने स्वत:वर बंदूक ताणली. तो फायर करणारच होता तितक्यात त्याच्या हातातून बंदूक खाली पडली असं प्रत्यक्षदर्शी ब्यूटी पार्लर मॅनेजर निधी यांनी सांगितले.