नाशिकच्या पंचवटी भागात रिक्षाचालकाचा दगडाने ठेचून खून

प्रशांत तोडकर रा. (रामवाडी) असे खून झालेल्या रिक्षाचालक युवकाचे नाव असल्याची प्राथमिक माहिती असून घटनास्थळी पोलिस अधिकारी व कर्मचारी दाखल झाले आहेत. 

- संदीप झिरवाळ 

नाशिक : दिंडोरीरोडवरील मेरी रासबिहारी लिंक रस्त्यावर असलेल्या औदुंबर लॉन्स जवळ एका मोकळ्या पटांगणात अंदाजे 28 ते 30 वर्षीय रिक्षा चालकाच्या डोक्यात कोणीतरी अज्ञात मारेकऱ्यांनी दगड घालून खून केल्याची घटना रविवारी (दि.16) सकाळी उघडकीस आली आहे. प्रशांत तोडकर रा. (रामवाडी) असे खून झालेल्या रिक्षाचालक युवकाचे नाव असल्याची प्राथमिक माहिती असून घटनास्थळी पोलिस अधिकारी व कर्मचारी दाखल झाले आहेत. 

मेरी रासबिहारी रस्त्यावर औदुंबर लॉन्स असून रविवारी सकाळी लॉन्स जवळ असलेल्या परिसरात एका युवकाचा रक्तबंबाळ अवस्थेत मृतदेह पडलेला असल्याची माहिती कोणीतरी म्हसरूळ पोलिसांना दिली. सदर घटनेनंतर वरिष्ठ पोलिस निरीक्षक सुभाष ढवळे यांच्यासह म्हसरूळ पोलिस ठाण्याच्या पोलिस पथकाने घटनास्थळी धाव घेतली होती. 

ज्या युवकाचा खून झाला आहे तो युवक रिक्षाचालक असून रामवाडी परिसरातील रहिवासी असल्याचे पोलिस सूत्रांनी सांगितले. रिक्षा चालक असलेल्या मयत प्रशांत नामक युवकाचा डोक्यात दगड घालून कोणी व का खून केला याची माहिती पोलिस घेत आहेत. शनिवारी मध्यरात्रीच्या सुमारास घडलेल्या या खुनाच्या घटनेची माहिती मिळावी यासाठी पोलिसांनी परिसरातील सीसीटीव्ही फुटेज तपासणी काम सुरू केले होते.