गोवा - महाराष्ट्रातील १६९ मटका दलालांवर कारवाई

लवकरच दोषारोपपत्र दाखल करणार : डॉ. प्रशांत अमृतकर

कोल्हापूर : पन्नासपेक्षा जास्त मटका, जुगाराचे गुन्हे दाखल असलेला मटकाचालक विजय लहू पाटील (वय ५०, रा. देवकर पाणंद) याच्या मटक्याच्या कनेकशनला पोलीसांनी सुरुंग लावला. गोवा-महाराष्ट्रातील १६४ बुकी चालकांवर कारवाई केली. या गुन्ह्याचे दोषारोपपत्र लवकरच न्यायालयात सादर केले जाणार आहे. अशी माहिती करवीर विभागीय पोलीस उपअधीक्षक डॉ. प्रशांत अमृतकर यांनी आज दिली. 

इस्पुर्ली ते नागाव मार्गावर सुरेश बाळासो मगदूम यांच्या राहत्या घरामागील खोलीमध्ये एजंट अनिल चौगुले हा राजरोस मटका चालवित असल्याची माहिती मिळाली. त्यानुसार डॉ. अमृतकर यांच्या आदेशानुसार पथकाने छापा टाकून १३ जणांना अटक केली होती. त्यांच्या ताब्यातून मटक्याच्या चिठ्ठ्या, रोकड, ३४ मोबाईल, सहा दुचाकी, असा सुमारे तीन लाख रुपये किमतीचा मुद्देमाल जप्त केला होता. या मटक्याचा बुकीमालक विजय पाटील असल्याचे तपासात निष्पन्न झाले होते. त्यानुसार इस्पुर्ली पोलिसांनी त्यालाही अटक  केली. मिळालेल्या मोबाइल वरील कॉल डिटेल्सची माहिती घेतली असता संशयित विजय पाटील याचे महाराष्ट्र-गोवा कनेकशन असल्याचे निष्पन्न झाले. त्याचे पाळेमुळे उखडून टाकण्यासाठी खोलवर तपास केला असता गोव्यातील लोकांकडून मटक्यासाठी पैसा घेणारे १६९ एजंट निष्पन्न झाले. या सर्वांकडे चौकशी केली असता त्यांनी संशयित पाटील याचे सांगण्यावरुन मटका घेत असल्याची कबुली दिली आहे. आणखी काही एजंट निष्पन्न होण्याची शक्यता आहे. संशयित पाटील अनेक वर्षापासून मटका व्यवसायात आहे. कारवाईचा त्याचेवर कोणताच फरक पडत नसे. कारवाई करुन पोलीसचं हतबल झाले होते. त्याने महाराष्ट्र गोव्यामध्ये बसविलेले कनेकशनच पोलीसांनी उखडून टाकल्याने अवैध व्यावसायीकांच्यात खळबळ उडाली आहे.