नागपुरात व्यसनाधिन नव-याची हत्या : हातोड्याने केला प्रहार

पत्नी आणि तरुण मुलाला वा-यावर सोडून बाहेरख्यालीपणा करीत फिरणा-या दारूड्या नव-याला त्याच्याच पत्नीने हातोड्याचा प्रहार करून ठार मारले. अजनी पोलीस ठाण्याच्या हद्दीत गुरुवारी सायंकाळी ६ च्या सुमारास ही थरारक घटना घडली.

ठळक मुद्देअजनीत घडला थरार : आरोपी महिला गजाआड

लोकमत न्यूज नेटवर्क
नागपूर : पत्नी आणि तरुण मुलाला वा-यावर सोडून बाहेरख्यालीपणा करीत फिरणा-या दारूड्या नव-याला त्याच्याच पत्नीने हातोड्याचा प्रहार करून ठार मारले. अजनी पोलीस ठाण्याच्या हद्दीत गुरुवारी सायंकाळी ६ च्या सुमारास ही थरारक घटना घडली. महेश पोरंडवार (वय ४४) असे मृताचे नाव असून, पोलिसांनी त्याची आरोपी पत्नी ममता महेश पोरंडवार (वय ४१) हिला अटक केली आहे.
जयवंत नगरात ममता महेश पोरंडवारचे निवासस्थान आहे. त्यांना एक मुलगी आणि एक मुलगा आहे. मुलीचे लग्न झाले असून, मुलगा (वय २१) बीसीएला शिकतो. पोरंडवार कुटुंबीयांची आर्थिक स्थिती तीन वर्षांपूर्वी चांगली होती. त्यांच्याकडे एक ट्रक, छोटा हाती आणि कारही होती. तीन प्लॉटही असल्याचे सांगितले जाते. काही वर्षांपूर्वी पोरंडवारला बाहेरख्यालीपणा आणि दारूचे व्यसन जडले. तेव्हापासून तो सर्व कमाई बाहेर उडवू लागला. आधी ट्रक, नंतर छोटे वाहन आणि कारही विकली. ही सर्व रक्कम त्याने बाहेर महिला आणि दारूमध्ये उडविली. त्याला विरोध केल्यास तो पत्नी आणि मुलाला मारहाण करायचा. त्याच्या बाहेरच्या शौकामुळे घरची आर्थिक स्थिती पूर्ण बिघडली. पत्नी ममता आणि विवाहित मुलगी तसेच नातेवाईक त्याची समजूत काढायचे. मात्र, तो त्यांनाच शिवीगाळ करून वाद घालायचा. गेल्या सात महिन्यांपासून तो अजनीत दुसरीकडे स्वतंत्र खोली करून एकटा राहू लागला. त्याने पत्नी आणि मुलाला अक्षरश: वा-यावर सोडले. बाहेर मौजमस्ती करून नोटा उधळणारा महेश पोरंडवार पत्नी आणि मुलाला खर्चासाठी अथवा शिक्षणासाठी दमडीही देत नव्हता. त्यामुळे उदरभरण करण्यासाठी ममता रुग्णांची केअरटेकर म्हणून खामल्यात काम करू लागली तर मुलगा शिकता शिकताच छोटे मोठे काम करत होता. ईकडे १५ ते २० लाखांचा एक प्लॉट पाच ते सात लाखांत विकण्याची तयारी महेशने चालविली होती. हे कळाल्यामुळे पत्नी, मुलगी आणि अन्य नातेवाईकांनी तो प्लॉट विकण्यास महेशला मनाई केली. त्यावरून महेश पत्नी ममता आणि विवाहित मुलीला घाणेरड्या भाषेत शिव्या देत होता.
मारायलाही धावायचा. हा सर्व प्रकार सुरू असतानाच मुलाची कॉलेजची फी भरण्यासाठी पैसे हवे म्हणून ममता गेल्या एक आठवड्यापासून महेशला वारंवार फोन करीत होती.
तो पैसे देतच नव्हता. उलट घाणेरड्या शिव्या द्यायचा. त्यामुळे गुरुवारी सायंकाळी ममता महेशच्या रूमवर गेली. तो दारूच्या नशेत टून्न होता. ममताने पतीलाकिमान मुलाच्या कॉलेजची फी तर द्या, अशी विणवनी केली. महेशने तिला पैसे देण्याऐवजी घाणेरड्या शिव्या देऊन मारहाण केली. पती-पत्नीमधील वाद वाढला. रागाच्या भरात ममताने बाजुला पडलेली हातोडी उचलली आणि महेश पोरंडवारच्या डोक्यात हाणली. त्यामुळे तो रक्ताच्या थारोळ्यात कोसळला.

पोलीसही हादरले !
हातोडी डोक्यावर बसल्याने रक्ताची चिरकांडी उडून तो खाली पडला. ते पाहून ममताने त्याला पाणी पाजून सावरण्याचा प्रयत्न केला. मात्र, दारूच्या नशेत आधीच टून्न असलेला महेश पोरंडवार कसलीही हालचाल करत नव्हता. त्याचा मृत्यू झाल्याचे लक्षात आल्याने ममता तेथून निघाली. तिने तडक अजनी पोलीस स्टेशन गाठले. आपल्या हातून पतीची हत्या झाल्याचे तिने पोलिसांना सांगितले. तिच्या कपड्यावर, तोंडावर रक्त उडाल्याचे पाहून काही वेळेसाठी पोलीसही हादरले. ठाणेदार संतोष खांडेकर यांच्यासह एपीआय डेहनकर, पीएसआय जाधव यांच्यासह पोलिसांचा ताफा घटनास्थळी धावला. त्यांनी पोरंडवारचा मृतदेह मेडिकलला पाठविला.

परिसरात हळहळ
पावसाळी वातावरण आणि गारठून ठाकणा-या थंडीत ही थरारक घटना घडल्याचे कळाल्याने परिसरात प्रचंड थरार निर्माण झाला. नागरिकांनी मोठ्या संख्येने तेथे गर्दी केली. दरम्यान, पोलिसांनी हत्येचा गुन्हा दाखल करून आरोपी ममताला अटक केली. एक सधन कुटुंबं अशा पद्धतीने उध्वस्त झाल्याने नागरिकांमध्ये हळहळ व्यक्त केली जात आहे.