बडतर्फ पोलीस शैलेश जगताप यांच्यासह इतरांवर फसवणुकीचा आणखी दोन गुन्हे दाखल

हडपसरमध्ये ११ जणांवर तर, खडक पोलीस ठाण्यात तिघांवर फसवणुकीचा गुन्हा दाखल

पुणे : जमिनीची अगोदरच विक्री झाली असताना तिच्या व्यवहारापोटी २० लाख रुपये घेऊन फसवणूक केल्याचा गुन्हा बडतर्फ पोलीस हवालदार शैलेश जगताप यांच्यासह तिघांवर खडक पोलीस ठाण्यात दाखल झाला आहे.शैलेश जगताप यांच्यावर आतापर्यंत कोथरुड, समर्थ आणि आता खडक आणि हडपसर अशा ४ पोलीस ठाण्यात गुन्हे दाखल झाले आहेत. 
शैलेश जगताप, प्रकाश फाले (रा़ सांगवी) आणि मिना कंजारी (रा़ पुणे) अशी गुन्हा दाखल झालेल्यांची नावे आहेत. 
याप्रकरणी सत्यभामा पोपट चांदगुडे (वय ४०, रा. चिखली) यांनी खडक पोलिसांकडे फिर्याद दिली आहे़ ही घटना नोव्हेंबर २०१५ मध्ये मामलेदार कचेरीमध्ये घडली होती. 
याबाबत पोलिसांनी सांगितले की, शैलेश जगताप, देवेंद्र जैन, रवींद्र बऱ्हाटे यांच्यावर कोथरुड, समर्थ पोलीस ठाण्यात फसवणूकीचे गुन्हे दाखल करण्यात आले आहेत़ सध्या समर्थ पोलिसांनी जैन, जगताप यांच्यासह ५ जणांना अटक केली आहे. 
मिना कंजारी यांनी आपली उंड्री येथील जागा २०१२ मध्ये विकली होती. तरीही त्यांनी दोन गुंठा जागा विकायची असल्याचे सांगितले. त्यासाठी शैलेश जगताप व प्रकाश फाले यांच्या मध्यस्थीने व्यवहार करण्यात आला. तसेच औंध येथील जमिनीच्या व्यवहारपोटी सत्यभामा चांदगुडे व त्यांच्या सहकाऱ्यांकडून आरोपींनी २० लाख रुपये घेतले. त्यापैकी १ लाख रुपयांची इसार पावती मामलेदार कचेरीमध्ये करण्यात आली होती. परंतु, चांदगुडे यांना ही जागा अगोदरच विकण्यात आली असल्याचे समजल्यावर त्यांनी पैसे परत मागितले. तेव्हा शैलेश जगताप यांनी पैसे परत मागितल्यास खोट्या गुन्ह्यात अडकविण्याची धमकी दिली होती. त्यामुळे घाबरुन आपण गप्प बसल्याचे चांदगुडे यांनी फिर्यादीत म्हटले आहे. पोलीस निरीक्षक उत्तम चक्रे अधिक तपास करीत आहेत.
दरम्यान, हडपसर पोलीस ठाण्यात प्रकाश फाले, त्याची पत्नी सविता फाले, शैलेश जगताप, त्याचा पुतण्या जयेश जगताप, परवेश जमादार, यश फाले, अ‍ॅड़ विजय काळे, माहिती अधिकार कार्यकर्ते रवी बऱ्हाटे , पत्रकार देवेंद्र जैन, विनय मुंदडा, मुकेश पौडवाल यांच्या विरोधात आणखी एक गुन्हा दाखल करण्यात आला आहे.
याप्रकरणी कैलास शिवाजी शिरसाठ (वय ३०, रा. काळेपडळ, हडपसर) यांनी हडपसर पोलिसांकडे फिर्याद दिली आहे. ही घटना २०१७ ते फेब्रुवारी २०२० दरम्यान घडली. प्रकाश फाले व इतरांनी कोथरुड, औंध, सेनापती बापट रस्त्यावरील जागा खरेदीत पैसे गुंतवल्यास दामदुप्पट नफा मिळेल, असे आमिष दाखवून शिरसाठी यांच्याकडून १० लाख व त्यांचे मेहुणे विलास नेवगे यांच्याकडून २० लाख रुपये असे ३० लाख रुपये घेतले. आपली फसवणूक झाल्याचे समजल्यावर पैसे परत मागितल्यावर जगताप यांनी रिव्हॉल्व्हरचा धाक दाखविला. अ‍ॅड. विजय काळे यांनी त्यांच्याशी संगनमत करुन तुमचे पैसे बुडणार नाही, अशी हमी देऊन दिशाभूल करुन फसवणूक केली़. सहायक पोलीस निरीक्षक भाबड अधिक तपास करीत आहेत.