मालवणीत दोन पोलिसांवर हल्ला; गणवेश फाडला, मिरचीपूड फेकली

Attack on two policemen in Malvani : दीपक चौहान असे या हल्लेखोराचे नाव असून त्याची महिला साथीदार मीरा देवी हिलादेखील ताब्यात घेण्यात आले आहे. पोलीस नियंत्रण कक्षावर चित्रकला चौरसिया नामक महिलेने तक्रार केली होती.

मुंबई : महिलेला अश्लील शिवीगाळ करणाऱ्या सराईत आरोपीला अडवणाऱ्या दोन पोलिसांवर  त्याने आणि त्याच्या महिला साथीदाराने हल्ला चढवला. यात एकाचा गणवेश फाडण्यात आला असून त्यांच्या डोळ्यात मिरची पावडरही फेकण्यात आली. या प्रकरणी मालवणी पोलिसांनी दोघांना अटक केली आहे. 
दीपक चौहान असे या हल्लेखोराचे नाव असून त्याची महिला साथीदार मीरा देवी हिलादेखील ताब्यात घेण्यात आले आहे. पोलीस नियंत्रण कक्षावर चित्रकला चौरसिया नामक महिलेने तक्रार केली होती. त्यानुसार पोलीस हवालदार अशोक चव्हाण आणि पोलीस नाईक देवकर हे बीट मार्शल घटनास्थळी दाखल झाले. त्या वेळी चौरसियाला चौहान अश्लील भाषेत शिवीगाळ करीत होता.  पोलिसांनी त्याला जाब विचारला तेव्हा त्यांच्याशी हुज्जत घालत त्याने झटापट करण्यास सुरुवात केली. देवकर यांच्या  गणवेशाच्या शर्टाचा खिसा फाडला. तसेच मीरा देवीने चव्हाण व देवकर यांच्या डोळ्यात मिरची पावडर फेकली. त्यात त्यांना दुखापत झाली आहे. जमा झालेल्यांच्या दिशेनेही दीपकने चाकू उगारून त्यांना ठार मारण्याची धमकी दिली. “आम्ही आरोपींना अटक केली असून त्यांच्यावर योग्य ती कारवाई केली जाईल,” असे वरिष्ठ अधिकाऱ्यांकडून सांगण्यात आले.