सावधान, तुम्हालाही परदेशी नोकरीची ऑफर आली का? आंतरराज्यीय टोळीचा झाला पर्दाफाश

गुन्हे शाखेकडून कारवाईत पाच जणांना अटक

लोकमत न्यूज नेटवर्क, मुंबई: परदेशी नोकरीच्या बेरोजगार तरुणांना लक्ष्य करत फसवणूक करणाऱ्या आंतराज्यीय टोळीचा गुन्हे शाखेने पर्दाफाश केला आहे. यामध्ये ३० ते ४० जणांची फसवणूक करत भामटे कार्यालयाला टाळे ठोकून पसार झाले होते. याप्रकरणी एमआरए मार्ग पोलिसांनी फसवणुकीचा गुन्हा नोंदवला. गुन्हे शाखेने या कारवाईत पाच जणांना अटक केली आहे.

ट्रॉम्बे येथील रहिवासी असलेले भरत शांताराम कोळी (४७) यांनी दिलेल्या तक्रारीनुसार, अमितोश श्रवणकुमार गुप्ता(लखनौ) भिवंडीतील फैजान अहमद फारुख अहमद शेख, शेख मन्सुरी मोहम्मद, रामकृपाल रामसेवक कुशवाह यांच्यासह दलाल  प्रमोद कुमार, शुभम सिंह, अरुण सिंह, अजय चौहाणसह त्यांचा बॉस आणि अन्य कर्मचाऱ्याविरुद्ध गुन्हा दाखल करण्यात आला आहे. आरोपींनी एमआरए मार्ग पोलिसांच्या हद्दीतील शहीद भगत सिंग रोड परिसरात कार्यालयात थाटले होते. आरोपींनी १९ जून २०२३ ते २९ ऑक्टोबर दरम्यान ही फसवणूक केली आहे.

तांत्रिक पुराव्यांच्या मदतीने आंतरराज्यीय टोळी दिल्ली, बिहार, उत्तर प्रदेश, भिवंडी व मुंबई येथून आपसात संगनमत साधून सक्रिय असल्याचे आढळून आले. त्यानुसार, पोलिस सहआयुक्त लखमी गौतम यांचे मार्गदर्शनाखाली एकूण ५ पोलिस पथके स्थापन करण्यात आली. त्यांना दिल्ली, जिल्हा लखनौ, राज्य उत्तर प्रदेश, जिल्हा गया, राज्य बिहार, भिवंडी महाराष्ट्र येथे पाठविण्यात आले. या पथकांनी आरोपींचा शोध घेऊन नमूद ठिकाणांहून  ५ आरोपींना अटक केली आहे. रामकृपाल रामसेवक कुशवाह (४५, भिवंडी), रोहित महेश्वर सिन्हा (३३, मुंबई), आशिषकुमार माहतो (३०, दिल्ली), अमितेश गुप्ता (४०, लखनौ) आणि राहुलकुमार चौधरी (२२, बिहार) अशी अटक आरोपींची नावे आहे. पोलिसांकडून अधिक तपास करण्यात येत आहे.

असे पसरवतात जाळे

बॉम्बे इंटरनॅशनल कन्सल्टन्सी या नावाने बनावट रजिस्टर क्रमांकाने कार्यालय उघडले. कोळी यांच्यासह ३० ते ४० जणांना अझरबैजान येथील पाशा कन्स्ट्रक्शन या कंपनीत नोकरी लावून देतो, असे सांगून जाळ्यात ओढवले. त्यांचा विश्वास संपादन करण्यासाठी बनावट ऑफर लेटर तसेच अझरबैजान या देशाचा बनावट वर्क व्हिझा तयार केला. त्यांना नोकरीचे आमिष दाखवून कोळी यांच्याकडून ४० हजार तर, अन्य सभासदांकडून प्रत्येकी ३५ ते ६० हजार रुपये उकळले. तरुणांचे पासपोर्ट ताब्यात घेतले होते. ते परत करण्यासाठीही ५ ते १० हजारांची मागणी करण्यास सुरुवात केली. 

अंधेरीत नवीन कार्यालय...

या टोळीने बेरोजगार तरुणांना लक्ष्य केले होते. आरोपींच्या चौकशीत मुंबईत अंधेरी सहार परिसरात अशाच प्रकारे खोटे नवीन नावाने विनापरवाना एजन्सी चालवून, अशाच प्रकारचा गुन्हा करत असल्याचे तपासात निष्पन्न होताच तेथेही छापा टाकून पुढील फसवणूक टाळण्यास पोलिसांना यश आले. 

६३ पासपोर्ट अन्...

पोलिसांनी कारवाई करत ६३ पासपोर्टसह अझरबैजान देशाचे एकूण  ७ बनावट व्हिजा, स्टिकर्स व कागदपत्रे,  ५ संगणक व संगणकीय साहित्य कलर प्रिंटर, ५ लॅन्डलाईन फोन व  ७ मोबाइल फोन इंटरनेट कनेक्शन राउटर, विविध कंपन्यांचे १४ मोबाइल सिम कार्ड, विविध रबरी शिक्के, विविध बँकांचे १० डेबिट कार्ड, ६ चेकबुक व पासबुक, ऑफर लेटर असे गुन्ह्यात वापरण्यात आलेले साहित्य हस्तगत करण्यात आले आहे.