जादूटोण्याच्या संशयावरुन तरुणाला मारहाण; घटनेचा व्हिडीओ सोशल मीडियावर व्हायरल

Crime News : अंबरनाथ तालुक्यातील काकडवाल गावातल्या शिवमंदिराजवळ होळीच्या रात्री तीन ते चार जण होमकुंडात कसली तरी पूजा करत असल्याचे गावातल्या काही जणांना आढळले.

अंबरनाथ : जादूटोण्याच्या संशयावरून एका तरुणाला मारहाण करण्यात आल्याची घटना अंबरनाथ तालुक्यातील काकडवाल गावात घडली आहे. या घटनेचा व्हिडीओ सोशल मीडियावर व्हायरल झाला आहे.    
               

अंबरनाथ तालुक्यातील काकडवाल गावातल्या शिवमंदिराजवळ होळीच्या रात्री तीन ते चार जण होमकुंडात कसली तरी पूजा करत असल्याचे गावातल्या काही जणांना आढळले. त्यामुळे ग्रामस्थांनी तिथे धाव घेतली असता तीन जण पळून गेले, तर एका तरुणाला ग्रामस्थांनी पकडून मंदिरात आणले. त्याने आपण जादूटोणा करत नव्हतो, तर पूजा करत होतो, असे सांगितले. मात्र ग्रामस्थांनी त्याला जादूटोणा करत असल्याच्या संशयावरून मारहाण केली. यानंतर या तरुणाला पोलिसांच्या ताब्यात देण्यात आले. मात्र ग्रामस्थांनी जादूटोण्याबाबत पोलिसांना कोणतीही तक्रार दिली नाही. उलट ज्या तरुणाला ग्रामस्थांनी पकडले, त्याच्या तक्रारीवरून पोलिसांनी मारहाण करणाऱ्या ग्रामस्थांच्या विरोधात अदखलपात्र गुन्हा, दाखल केल्याची माहिती पोलिसांनी दिली आहे. 

धक्कादायक! दुसऱ्या मजल्यावरुन लिफ्ट कोसळली, सात महिला जखमी

खळबळजनक! न्यायालय परिसरातच महिला वकिलावर चाकूहल्ला