"मी आमदार बोलतोय...", आरोपीने फोन करून पोलिसांना धमकावले; त्यानंतर काय घडले?

पोलिसांनी पकडलेल्या आपल्या साथीदारांची सुटका केली नाही म्हणून एका व्यक्तीने नकली आमदार बनून पोलीस स्टेशनच्या अधिकाऱ्याला धमकी दिली.

भटिंडा : सहसा बनावट अधिकाऱ्यांकडून फसवणूक आणि लोकांची दिशाभूल केल्याची प्रकरणे सातत्याने उघडकीस येत असतात. मात्र, अशीच एक अनोखी घटना भटिंडा येथे उघडकीस आली आहे. पोलिसांनी पकडलेल्या आपल्या साथीदारांची सुटका केली नाही म्हणून एका व्यक्तीने नकली आमदार बनून पोलीस स्टेशनच्या अधिकाऱ्याला धमकी दिली. त्यानंतर पोलीस ठाण्याच्या अधिकाऱ्याला संशय आल्याने त्यांनी खऱ्या आमदाराला फोन करून या प्रकरणाची चौकशी केली. 

त्यावेळी समजले की, आमदारांनी पोलीस ठाण्यात फोन केला नाही आणि ते भटिंडामध्येही उपस्थित नव्हते. पोलिसांचा संशय खरा ठरल्यानंतर नकली आमदार म्हणून फोन करणारा आरोपी हरविंदर सिंग निवासी कोठे, बाबा जीवनसिंग दान सिंग वाला यांना पोलिसांनी अटक केली आणि त्यांच्याविरुद्ध नेहियानवाला पोलीस ठाण्यात गुन्हा दाखल केला. हरविंदर सिंग याने स्वतःला भुच्चो हलकाचे आमदार मास्टर जगसीर सिंग असल्याचे फोन करून पोलिसांना धमकी दिल्याचे सांगितले जात आहे.

मिळालेल्या माहितीनुसार, गोनियाना पोलीस चौकीच्या पोलीस पथकाने 19 डिसेंबर रोजी लुटमारीच्या आरोपाखाली तीन तरुणांना अटक केली होती. आरोपी हरविंदर सिंग हा तिन्ही तरुणांना सोडवण्यासाठी चौकी प्रभारी उपनिरीक्षक मोहनदीप सिंग बांगी यांच्याकडे आला, जो स्वत:ला आम आदमी पार्टीचा महासचिव असल्याचे सांगत होता. मात्र, चौकी प्रभारीने पकडलेल्या तरुणांना कलम 109 अन्वये तुरुंगात टाकण्यात आले होते. त्यामुळे त्यांचा जामीन एसडीएमकडून मिळवावा लागत होता.

आरोपी हरविंदर सिंगने त्याच्या तीन साथीदारांना जामीन मिळाल्यानंतर 23 डिसेंबर रोजी उपनिरीक्षक मोहनदीप सिंग यांना फोन केला आणि भुच्चो हलकाचे आमदार मास्टर जगसीर सिंग तुमच्यासोबत बोलतील असे सांगितले. यावेळी त्याने स्वत: आमदार असल्याचे दाखवून उपनिरीक्षकांशी फोनवर बोलून अटक केलेल्या साथीदाराना का सोडणे नाही? असा जाब विचारत धमकी दिली.

खऱ्या आमदारांनाही आश्चर्य वाटले
सीआयए स्टाफमध्ये बराच काळ काम केलेले पोलीस ठाण्याचे प्रभारी मोहनदीपसिंग बांगी यांना या फोनवर संशय आला की, कोणताही आमदार पोलीस अधिकाऱ्याशी या टोनमध्ये फोनवर बोलत नाही. त्यानंतर त्यांनी या प्रकरणाची चौकशी केली असता आमदार चंदीगडहून पटना साहिबला विमानाने गेल्याचे समजले. याशिवाय, खऱ्या आमदारांसोबत याबाबत चर्चाही केली. त्यांनी स्वत: काहीही असं बोलले नसल्याचे सांगत आश्चर्य व्यक्त केले. त्यानंतर पोलिसांनी आरोपी हरविंदर सिंगविरुद्ध नेहियानवाला पोलीस ठाण्यात बनावट आमदार म्हणून पोलीस कर्मचाऱ्याला धमकावल्याप्रकरणी गुन्हा दाखल करून त्याला अटक केली.